O‘tgan yarim yil davomida 171 ta tadbirkorlik subyektida 1,2 trillion so‘mlik soliq bazasi yashirilgani aniqlangan. Buning uchun ularga jami 240,1 milliard so‘m miqdorida jarimalar qo‘llanilgan.
Soliq organlari tomonidan 2023-yil yanvar—iyun oylarida soliqlarni to‘lamaslik xavfi yuqori bo‘lgan 533 ta tadbirkorlik subyektida soliq auditi o‘tkazildi. Tekshiruv davomida aniqlangan soliq xavfi summasi 255,5 milliard so‘mni tashkil etgan. Soliq auditida tasdiqlangan summa esa 969 milliard so‘m bo‘lgan.
Aniqlangan summa sohalar kesimida:
- savdo va umumiy ovqatlanish – 331 milliard so‘m (34,1 foiz);
- ishlab chiqarish – 235,6 milliard so‘m (24,3 foiz);
- qurilish sohasida – 133,2 milliard so‘m (13,8 foiz);
- xizmat ko‘rsatish – 89 milliard (9,2 foiz);
- qishloq xo‘jaligi – 5,5 milliard so‘m (0,6 foiz);
- transport – 4,9 milliard so‘m (0,5 foiz);
- boshqa sohalar– 169,8 milliard so‘m (17,5 foiz).
O‘tkazilgan soliq auditlarida 30 ta soliq to‘lovchida 171 milliard so‘mlik soliq bazasi yashirilgan, 124 ta subyektda 750,3 milliard so‘mlik sotilgan tovarlar summasi ko‘rsatilmagan. Shuningdek, 46 ta subyektda 406,8 milliard so‘mlik tovarlar inventarizatsiya paytida ombor yoki realizatsiya joyida mavjud bo‘lmagan. Qolgan 16 ta subyektda 43,3 milliard so‘mlik kirim qilinmagan tovarlar saqlangan va (yoki) realizatsiya qilingan.
“Bugungi kunda aniqlangan soliq summalaridan to‘lov muddati kelgan 518,9 milliard so‘mning 398,3 milliard so‘mi (77 foiz) to‘lab berilgan” — deyiladi Soliq qo‘mitasi xabarida.
Maʼlumot uchun, 2022-yilda soliq organlari 433 ta tadbirkorlik subyektida audit o‘tkazib, 3,2 trillion so‘mlik soliq bazasi yashirilganini aniqlagan va aybdorlarga 649 milliard so‘mlik jarimalar qo‘llangan.
Izoh (0)