Farg‘ona, Batken va So‘g‘d viloyatlari rahbarlari 2 yildan so‘ng yana yig‘ilish o‘tkazdi

Qirg‘izistonda Farg‘ona, Batken va So‘g‘d viloyatlari rahbarlarining mintaqaviy hamkorlik uchrashuvi o‘z ishini boshladi, deb xabar bermoqda Farg‘ona viloyati hokimligi axborot xizmati.

Unga ko‘ra, Qirg‘izistonning Cho‘lpon ota shahrida joylashgan Baytur majmuasi hududida Farg‘ona, Qirg‘izistonning Batken hamda Tojikistonning So‘g‘d viloyatlari rahbarlarining mintaqaviy uchrashuvi o‘z ishini boshladi. Farg‘ona viloyati hokimi Xayrullo Bozorov, Batken viloyati gubernatori Abdikarim Alimbayev va So‘g‘d viloyati raisi Rajabboy Ahmadzoda ishtirokida bo‘lib o‘tayotgan chegara hududlari rahbarlarining mintaqaviy uchrashuvida uch chegaradosh viloyatning rasmiylari ham ishtirok etmoqda.

Kengaytirilgan tartibda o‘tkazilgan uch tomonlama uchrashuv davomida savdo-iqtisodiy, ijtimoiy-madaniy, turizm va boshqa sohalarda hududlararo hamkorlikning bugungi holati va uni kengaytirish istiqbollari muhokama qilindi.

Uch chegaradosh viloyatlar rahbarlarining dastlabki uchrashuvi 2021-yil aprel oyida Farg‘onada bo‘lib o‘tgandi.