AQSH Milliy xavfsizlik kengashi matbuot kotibi Jon Kirbining aytishicha, Vashington Tehron bilan Eronda saqlanayotgan amerikalik fuqarolarni qaytarish bo‘yicha muzokara olib boryapti. Yangi yadroviy kelishuv muhokamasi kun tartibidan o‘rin olmagan.
“Biz noqonuniy ushlab turilgan amerikaliklarni vatanga qaytarishga e’tibor qaratmoqdamiz”, — dedi Kirbi Fox News telekanaliga bergan intervyusida.
“Ayni paytda Eron bilan yadroviy kelishuvga qaytish hozircha asosiy vazifa emas”, — deya qo‘shimcha qildi u.
Uning so‘zlariga ko‘ra, agar Tehron “yadro sohasidagi keskinlikni pasaytirish choralarini ko‘ra boshlasa, bu mintaqa, AQSH va Amerika milliy xavfsizligi manfaatlari uchun yaxshi yangilik bo‘ladi”.
Iyun oyida OAV AQSH va Eron Tehronda hibsga olingan amerikaliklarni ozod qilish bo‘yicha kelishuvga erishishga yaqin ekani haqida xabar bergan edi.
Izoh (0)