O‘rta Yer dengizi orqali Shimoliy Afrikadan Yevropaga noqonuniy migratsiya so‘nggi olti oy ichida kamida 289 bolaning hayotiga zomin bo‘ldi, deb xabar bermoqda UNICEF.
Tashkilotning ta’kidlashicha, halok bo‘lgan bolalarning haqiqiy soni ancha ko‘p bo‘lishi mumkin, chunki cho‘kib ketgan kemalar juda ko‘p, ularda hech kim omon qolmagan.
“Dengizda hayotni saqlab qolish bo‘yicha sa’y-harakatlarni kuchaytirish bilan birga, bolalarning boshpana olishi uchun xavfsiz va qonuniy yo‘llarni yaratish borasida ko‘proq ish qilish kerak”, — deyiladi UNICEF ijrochi direktori Ketrin Rasselning so‘zlaridan iqtibos keltirilgan xabarda.
Bu muammoni hal qilish uchun u ota-onalarni o‘z farzandlarining hayotini xavf ostiga qo‘yadigan sabablarni bartaraf etishga chaqirdi.
UNICEF hisob-kitoblariga ko‘ra, 2023-yil yanvar oyidan buyon Afrikadan Italiyaga 11 600 nafar bola kelgan, bu o‘tgan yilning shu davriga nisbatan ikki baravar ko‘p.
14-iyun kuni Gretsiya qirg‘oqlarida shimoliy afrikalik muhojirlar o‘tirgan baliqchi qayiq ag‘darilib ketgandi. 100 dan ortiq odam qutqarib olindi. Qayiq bortida 700 nafargacha odam bo‘lgani taxmin qilinmoqda. Qolganlar tirik topilmagan.
Iyul boshida esa Kanar orollari yaqinida kema cho‘kib ketishi oqibatida bortdagi 51 muhojir halok bo‘ldi. Ispaniya Ichki ishlar vazirligi maʼlumotlariga ko‘ra, 2023-yilning yanvaridan mayigacha Kanar orollariga 4,4 mingdan ortiq noqonuniy muhojirlar kirib kelgan.
Izoh (0)