Shavkat Mirziyoyevning inauguratsiyasi 14-iyul, juma kuni bo‘lib o‘tadi. Bu haqda Senat axborot xizmati xabar berdi.
Shu kuni Oliy Majlis Qonunchilik palatasi va Senatining O‘zbekiston Respublikasi saylangan prezidentining lavozimiga kirishishiga bag‘ishlangan qo‘shma majlisi o‘tkaziladi.
Marosimda MSK raisi Zayniddin Nizomxo‘jayev Shavkat Mirziyoyevga prezidentlik guvohnomasini topshirishi kutilmoqda. Qasamyod qabul qilganidan so‘ng unga prezident rasmiy belgisi va shtandarti ham topshiriladi.
Eslatib o‘tamiz, 9-iyul kuni bo‘lib o‘tgan prezident saylovi natijalariga ko‘ra Shavkat Mirziyoyev 87,05 foiz ovoz olib, g‘olib bo‘lgandi. Robaxon Mahmudova 4,43 foiz, Ulug‘bek Inoyatov 4,02 foiz, Abdushukur Hamzayev 3,74 foiz ovoz olgandi.
Shavkat Mirziyoyevning prezidentlik faoliyati
Shavkat Mirziyoyev 2016-yil 4-dekabr kuni bo‘lib o‘tgan Prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. 2021-yil 24-oktabr kuni bo‘lib o‘tgan prezident saylovida 80,1 foiz ovoz bilan O‘zbekiston prezidenti etib qayta saylangan. 6-noyabr kuni Oliy Majlis Senati binosida inauguratsiya marosimi bo‘lib o‘tgan.
Majlisni Markaziy saylov komissiyasi raisi Zayniddin Nizomxo‘jayev ochib berib, Shavkat Mirziyoyevga prezident guvohnomasi va MSK shahodatnomasini topshirgan. Shundan so‘ng Shavkat Mirziyoyev O‘zbekiston Konstitutsiyasi va Qur’oni Karimga qo‘l qo‘ygan holda qasamyod qilgan va yig‘ilganlar qarshisida nutq so‘zlagan.
Izoh (0)