Imtiyozli pensiya necha yoshdan tayinlanadi? Pensiya jamg‘armasi maʼlumot berdi

O‘zbekistonda imtiyozli pensiya 50 yoshdan, ish staji kamida 20 yil bo‘lgan fuqaroga tayinlanadi. Bu haqda Pensiya jamg‘armasi axborot berdi.

Pensiya jamg‘armasiga 53 yoshli maktab o‘qituvchisi nogiron qizi borligi uchun imtiyozli pensiyaga chiqmoqchiligi, ish staji 19 yil ekanini aytib, murojaat yo‘llagan. Jamg‘armaning maʼlum qilishicha, imtiyozli pensiyaga chiqish uchun kamida 20 yillik ish staji talab etiladi.

“Bolalikdan nogironligi bo‘lgan farzandlarning onalari ularni sakkiz yoshgacha tarbiyalagan bo‘lsa hamda ish staji kamida 20 yil bo‘lgan taqdirda, 50 yoshdan imtiyozli pensiya tayinlanadi. Qonunchilik talablaridan kelib chiqib, fuqaroning mehnat staji 20 yilni tashkil qilmagani sababli 53 yoshdan imtiyozli pensiyaga chiqish huquqi mavjud emas”, — deyiladi manba axborotida.

Maʼlumot uchun, O‘zbekistonda erkaklar 60 yoshga, ayollar 55 yoshga to‘lganda ularga to‘liq pensiya tayinlanishi belgilangan. Fuqaroning mehnat staji kamida 7 yil bo‘lganda unga to‘liqsiz yoshga doir pensiya tayinlanadi. Bugungi kunda ish staji to‘liq bo‘lmagan chog‘dagi yoshga doir pensiyaning eng kam miqdori qo‘shimcha to‘lovni hisobga olgan holda — oyiga 535 000 so‘m.

“Pensiya miqdori ish haqi va ish stajiga bog‘liq. Agar fuqaro ijtimoiy soliqni qancha ko‘p to‘lasa, pensiya miqdori ham shuncha yuqori bo‘ladi”, — deya xabar bergan Pensiya jamg‘armasi.

Ayni paytda mamlakatda pensiya va nafaqa oluvchilarning umumiy soni 4 million 447 ming 597 nafar. Shundan pensiya oluvchilar 3 million 839 ming 508 nafar, nafaqa oluvchilar 608 ming 89 nafar. 2023-yilning 1-iyun holatiga ko‘ra, yoshga doir pensiya oluvchilar soni 3 million 182 ming 617 nafarni, nogironlik pensiyasini oluvchilar 426 ming 532 nafarni, boquvchisini yo‘qotganlik pensiyasini oluvchilar 230 ming 359 nafarni tashkil qiladi.