Turkmanistonning Qozog‘istondagi elchisi Botir Rejepov Ashxobodda davlat to‘ntarishiga urinish bo‘lgani haqidagi xabarlarni rad etdi. Bu haqda diplomatning so‘zlariga tayanib, Tengrinews xabar berdi.
Diplomatga ko‘ra, Turkmanistonda davlat to‘ntarishiga urinish bo‘lgani haqidagi xabarlar haqiqatga to‘g‘ri kelmaydi va feyk hisoblanadi. Rejepov mamlakatda vaziyat tinch ekanini ta’kidladi.
Uning so‘zlariga ko‘ra, “vakolatli organlar ishonchsiz ma’lumotlarni kim va nima sababdan qo‘zg‘atganini aniqlaydi”.
Diplomat, shuningdek, yaqinda, 29-iyun kuni yangi Arkadag‘ shahrining ochilishi munosabati bilan mamlakatda yirik tadbirlar o‘tkazilganini qo‘shimcha qildi.
“Qozog‘istondan hukumat vakillari ishtirok etdi. Bizda hammasi tinch, hammasi normal rejimda”, — dedi u.
Niderlandiyada joylashgan Turkmen News nashri avvalroq iyun oyida Turkmaniston poytaxtida mahalliy xavfsizlik kuchlari tomonidan qurolli to‘ntarishga urinishning oldi olingani haqida xabar bergandi.
Endilikda ushbu xabar mualliflari barcha tafsilotlar aniqlanguniga qadar uni nashrdan olib tashlaganliklarini e’lon qildi.
Izoh (0)