Joriy yilning 7-iyul kuni O‘zsanoatqurilishbank tomonidan “Investorlar kuni” tashkil etildi. Xalqaro moliyaviy institutlari, nufuzli bank va yetakchi kompaniyalar vakillari ishtirokida bo‘lib o‘tgan tadbirda qator kelishuvlarga erishildi.
Shu kunlarda poytaxtimizda o‘tkazilgan “Yangi O‘zbekiston: taraqqiyot, innovatsiya va maʼrifat” mavzusidagi xalqaro sheriklik tashabbuslari haftaligi doirasida ko‘pgina tadbirlar tashkil qilinib, unda xalqaro ekspertlar bilan Yangi O‘zbekistondagi islohotlar yuzasidan fikr almashildi.
Xalqaro moliya korporatsiyasi, Yevropa tiklanish va taraqqiyot banki, AQSHning “JP Morgan Chase”, Buyuk Britaniyaning “ICBC Standard PLC”, “ImpactA Global” va “Khumo 7 Consulting”, Germaniyaning “Commerzbank”, “KfW IPEX-Bank GmbH”, “Landesbank Baden-Wurttemberg” va “Deutsche Bank”, Avstriyaning “Raiffaisenbank”, Fransiyaning “Rothschild & Co”, “Natixis” hamda Fransiya taraqqiyot uyushmasi kabi yirik bank-moliya va investitsiya kompaniyalari vakillari ishtirokida o‘tkazilgan “Investorlar kuni”da dastlab O‘zsanoatqurilishbank faoliyati taqdimot qilindi.
Xususan, mehmonlar muassasa tomonidan 2020-2025-yillarga mo‘ljallangan O‘zbekiston Respublikasining bank tizimini isloh qilish strategiyasi doirasida korporativ boshqaruv, chakana, kichik va o‘rta biznes, filiallar tarmog‘ini boshqarish, IT, tranzaksion biznes, risklarni boshqarish hamda “yashil” bank yo‘nalishlarida amalga oshirilgan transformatsiya ishlari natijalari bilan tanishtirildi.
Bank tizimida zamonaviy yechimlarni joriy etish, moliyaviy va inson resurslari samaradorligini oshirishga ijobiy taʼsir ko‘rsata oladigan istiqbolli investorlarni jalb qilish va ular yordamida yanada samarali infratuzilma yaratishga qaratilgan masalalar yuzasidan muzokaralar olib borildi.
Tadbir davomida “JP Morgan Chase” vakillari tomonidan O‘zbekiston banklarining jahon kapital bozoriga integratsiyasiga bag‘ishlangan sessiya ham o‘tkazildi.
Unda O‘zbekiston taraqqiyotining yangi bosqichida hukumat tomonidan amalga oshirilayotgan chuqur tarkibiy o‘zgarishlar, shu jumladan, iqtisodiyot yo‘nalishidagi islohotlar natijasi jahon hamjamiyati tomonidan alohida eʼtirof etilayotgani taʼkidlandi.
Iqtisodiyotning asosiy bo‘g‘inlaridan biri – kapital bozorini rivojlantirishda O‘zbekistonda katta salohiyat mavjudligi qayd etildi.
Xorijiy hamkorlar ushbu sohaga ilg‘or tajribani olib kirishda bozor ishtirokchilariga ko‘maklashishga tayyorligini bildirdi. Tomonlar o‘rtasida shu va boshqa yo‘nalishlar bo‘yicha xamkorlikni kengaytirish yuzasidan rejalar belgilab olindi.
Tadbir yakunlariga ko‘ra qariyb 32 million dollarlik, shu jumladan, O‘zsanoatqurilishbank va “Raiffaisenbank” o‘rtasida savdoni moliyalashtirish bo‘yicha 15 million yevro miqdoridagi kredit bitimi hamda “ICBC Standard PLC” banki bilan 15 million AQSH dollari ekvivalentigacha bo‘lgan miqdorda milliy valyutada nominallangan qisqa muddatli banklararo kreditni jalb qilish yuzasidan kelishuvga erishildi.
Reklama huquqi asosida.
Izoh (0)