Qozog‘iston prezidenti Qosim-Jo‘mart To‘qayev Ostonaning 25 yilligiga bag‘ishlangan “qardosh shaharlar” forumida so‘zlagan nutqida Nursulton Nazarboyevning 1994-yilda poytaxtni Oqmo‘laga ko‘chirish haqidagi qarori haqida gapirdi. Bu haqda Liter.kz xabar berdi.
“Ma’lumki, poytaxtni ko‘chirish qarori oson bo‘lmagan. Katta hajmdagi ishlar amalga oshirilgan. Bu mamlakat uchun juda og‘ir davr edi: iqtisodiy tanazzul, odamlar bozor munosabatlariga tayyor emas edi.
Ana shunday og‘ir davrda birinchi prezident tashabbusi bilan 1994-yil 6-iyulda Oliy Kengash poytaxtni Oqmo‘la shahriga o‘tkazish to‘g‘risida qaror qabul qildi. Rasmiy ravishda Oqmo‘la 1997-yil 10-dekabrda mamlakatning asosiy shahriga aylandi. Bundan 25 yil avval, 1998-yil 6-mayda Oqmo‘laning nomi Ostonaga o‘zgartirildi”, — dedi To‘qayev.
Uning fikricha, poytaxtni ko‘chirish tashabbusi geosiyosiy nuqtayi nazardan to‘g‘ri qadam bo‘lgan.
“Bu xalqimiz kelajagini ko‘p jihatdan belgilab bergan muhim va tarixiy o‘z vaqtida qabul qilingan qaror. Birinchi prezidentning bu tashabbusi yangi milliy g‘oyaga aylandi. Albatta, bu milliy manfaatlarimizga to‘la mos keladi. Shuning uchun biz Nursulton Abishevich Nazarboyevning bu boradagi hissasini munosib va adolatli baholashimiz kerak”, — dedi u.
Izoh (0)