Ko‘plab tomoshabinlar Bollivud aktyori Jimmi Shergilni “Qalbimda sensan” filmidagi obrazi orqali taniydi. Biroq aktyor kinodagi karyerasi davomida boshqa ko‘plab filmlarda rol ijro etgan. Quyida aktyorning shaxsiy hayoti va karyerasi haqida ma’lumot beriladi.
Aktyorning haqiqiy ismi Jasjit Singx Gill. U 1970-yilning 3-dekabr sanasida tug‘ilgan. U ko‘plab xolalari, amakilari, amakivachchalari, bobo va buvilari bilan bir uyda voyaga yetgan. Oila juda badavlat bo‘lib, fermer xo‘jaliklari, shakar zavodlari va spirtli ichimliklar zavodlariga ega edi.
Jimmi nufuzli maktablarda o‘qigan, san’at sohasi bo‘yicha bakalavr darajasini olgan. Jimmi AQSHda magistr darajasini olishi kerak edi, biroq uning amakivachchasi aktyorga Mumbayga borib, aktyorlik saboqlarini boshlashi kerakligini aytadi. Shergill hind tilini juda yaxshi bilar edi va Bollivud filmlarida rol o‘ynay boshlaganida bu unga ko‘p yordam berdi.
“Mening amakivachcham Suminder, xolamning o‘g‘li mendan o‘n yosh katta edi va Dehlida yashardi. U otasi vafotidan keyin o‘zini yolg‘iz his qildi va ota-onamdan Dehlida bir muddat qolishimni so‘radi. Biz juda yaqin do‘stlarga aylandik.
Suminder Hindistondagi eng yaxshi dizaynerlarning kolleksiyalarini sotadigan do‘konga ega edi. Uning do‘koniga mashhur insonlar tez-tez kelardi. Aynan akam menga kino uchun yaratilganimni aytgan edi.
Men uning gapiga kulardim, chunki Sanni Deol va Sanjay Dattning jangovar filmlaridan boshqa hind filmlarini ko‘rmaganman, sababi men ularning ashaddiy muxlisi edim. Sevimli mashg‘uloti sifatida rasm chizgan dadam va uning xolasi, taniqli rassom Amrita Shergildan tashqari, san’at olamiga aloqam yo‘q edi. Biroq amakivachcham miyamdagi fikrlarni shunchalik o‘zgartirib yubordiki, men hind filmlarini ko‘ra boshladim.
Mumbayga kelib, o‘zimni sinab ko‘rishga qaror qildim. Roshan Tanejining aktyorlik maktabiga o‘qishga kirdim va u yerda bir yarim yil o‘qidim. Uydagilar meni 15 kunga ham chiday olmaydi deb o‘ylashdi, biroq men shunday qildim. Albatta, oilam meni hamma narsada ham ma’naviy, ham moddiy tomondan qo‘llab-quvvatladi.
1994-yilda Gulzor akaning “O‘t qo‘yuvchilar” filmini suratga olmoqchi ekanini bilib, unga assistent bo‘lib ishga kirmoqchi bo‘lganman. Biroq Gulzor men bilan gaplashib, bu ishda filmdagi kichik bo‘lsa-da, birinchi rolni menga topshirdi.
“O‘t qo‘yuvchilar” filmi kassada yaxshi daromad olib keldi va aktyorni sanoatning etakchi direktorlari e’tiboriga havola etdi. Jimmi Aditya Chopraning “Muhabbat qissalari” musiqiy dramasida suratga tushganidan keyin mashhurlikka erishdi, bu loyiha 2000-yilda Bollivudning eng ko‘p daromad keltirgan filmiga aylandi, shundan so‘ng aktyor “Mening sevgilimning to‘yi” (2002-yil), “Munnaboy” (2003-yil), “Sen va men” (2004-yil), “Tanu va Manuning to‘yi” (2011-yil), “26 qaroqchi” (2013-yil) kabi mashhur filmlarda rol o‘ynagan.
Shuningdek, u “Mening ismim Xon” (2010-yil) dramasida, “Tanu va Manuning to‘yi 2” romantik komediyasida rol o‘ynagan va bu unga Filmfare mukofotining “Ikkinchi plandagi eng yaxshi aktyor” nominatsiyasini taqdim etgan. Uning filmografiyasida ko‘plab panjob loyihalari mavjud.
1996 yilda Jimmi debyut filmi namoyishiga tayyorgarlik ko‘rayotganda bo‘lajak rafiqasi Priyanka Puri bilan tanishgan. U otasi bilan birga ishlagan, qurilish va interyer bilan shug‘ullangan.
Juftlik besh yil uchrashib yurdi va 2001-yilda turmush qurdi. Jimmining so‘zlariga ko‘ra, Priyanka uning birinchi sevgisi va u bilan oila qurganidan juda xursand. Ularning Vir ismli o‘g‘li bor.
Jurnalistlarga aktyorning hayoti qiziq emas. Jimmi bilan ishlagan insonlarning fikricha, u mutlaqo ziddiyatga bormaydigan inson. U o‘zining 27 yillik faoliyati davomida hech qachon kinodagi partnyorlari bilan munosabat qurmagan va aktyor bilan juda kamdan-kam hollarda muammo sodir bo‘ladi.
Aktyor haqida g‘iybat va mish-mishlar yo‘q va uning iste’dodi Bollivud sanoatida haqiqatan kam baholangan . Jimmi faoliyatini sevgi qahramoni sifatida boshlangan, biroq u o‘zini chuqurroq va ko‘p qirrali rollar bilan isbotlab, mahoratli ikkinchi plandagi aktyorga aylandi. U aslida panjob kino sanoatini jonlantirdi.
Uning panjob loyihalari kassada yaxshi natijalarga erishmoqda. Aktyor Bollivudda unchalik mashhur bo‘lmasa-da, hamkasblar uni juda hurmat qiladi.
Izoh (0)