Toshkent shahar mahalliy budjeti 2022-yilda jami 29 trillion 561 milliard so‘mni tashkil etdi va belgilangan 26 trillion 814 milliard so‘mlik prognoz 110 foizga bajarildi. Bu haqdagi ma’lumot Xalq deputatlari Toshkent shahar kengashi qarorida keltirib o‘tilgan.
Shahar Iqtisodiyot va moliya bosh boshqarmasining hisobotiga ko‘ra, budjet daromadlari o‘tgan yilning mos davriga nisbatan 7,6 milliard so‘mga ko‘p bo‘lgan. Mahalliy budjetlar daromadlari 7 trillion 73 milliard so‘mni tashkil etgan. Bu Toshkent shahar va tumanlar mahalliy budjetlari belgilagan 6 trillion 185 milliard so‘mlik prognoz 114 foizga bajarilganini anglatadi. Buning natijasida budjet ixtiyorida prognozdan tashqari 888,5 milliard so‘m qo‘shimcha mablag‘ qolgan.
Mahalliy budjetlar ixtiyorida jami 973,5 milliard so‘m mablag‘lar qoldirilgan. Jumladan:
- Mirobod tumanida 9,2 milliard so‘m;
- Olmazor tumanida 5 milliard so‘m;
- Yunusobod tumanida 9,9 milliard so‘m;
- Mirzo Ulug‘bek tumanida 8,9 milliard so‘m;
- Chilonzor tumanida 9,4 milliard so‘m;
- Yashnobod tumanida 6,3 milliard so‘m;
- Sergeli tumanida 5,6 milliard so‘m mablag‘ mavjud.
Ta’kidlanishicha, respublika budjetiga soliq tushumlari bo‘yicha belgilangan prognozdan ortiqcha tushirilgan 2 milliard 131 million so‘m mablag‘ Toshkent shahar mahalliy budjetiga o‘tkazib berilgan.
Bundan tashqari, 2022-yil yakunlariga ko‘ra yalpi hududiy mahsulot (YHM) nominal hajmi joriy narxlarda 147,4 trillion so‘mni yoki 13,3 milliard dollarni tashkil etgan. Bu orqali YHM hajmi 2021-yil bilan taqqoslaganda 7,9 foizga o‘sgan. Bunda xizmatlar YHMning 56,4 foizini yoki 74,9 trillion so‘mni, sanoat 33,5 foizini yoki 44,5 trillion so‘mni, qurilish 10,1 foizini yoki 3,4 trillion so‘mni va sof soliqlar 9,9 foizini yoki 14,6 trillion so‘mni tashkil etgan.
Izoh (0)