Qirg‘iziston mamlakatning voyaga yetgan fuqarolariga pasportda otasining ismi qatorida onasining ismini qo‘llashga rasman ruxsat berdi.
Tegishli qaror respublika Konstitutsiyaviy sudi tomonidan qabul qilingan. Qaror matnini ikki yarim yildan beri davlat hokimiyati organlarini sudga berib kelayotgan qirg‘izistonlik faol Oltin Kapalova Facebook sahifasida e’lon qildi.
Respublika Konstitutsiyaviy sudining qarorida amaldagi normativ-huquqiy hujjatlarga tegishli o‘zgartirishlar kiritish Vazirlar Mahkamasi zimmasiga yuklatilgan.
“Qaror yakuniy hisoblanadi. Apellyatsiyaga berilmaydi. E’lon qilingan paytdan boshlab kuchga kiradi. Qaror respublika bo‘ylab barcha davlat organlari, mahalliy o‘zini o‘zi boshqarish organlari, mansabdor shaxslar, jamoat birlashmalari, yuridik va jismoniy shaxslar tomonidan ijro etilishi majburiydir”, — deyiladi Konstitutsiyaviy sud qarorida.
Faolning qayd etishicha, endilikda Qirg‘izistonning har bir voyaga yetgan fuqarosi onasining ismini olishi mumkin.
“Men Qirg‘iziston Respublikasi Konstitutsiyaviy sudiga ushbu qarori uchun minnatdorlik bildiraman va 16 yoshli o‘g‘lim Daniyar Altinovich Kapalovni tabriklayman, u tez orada pasport olishga boradi va mening ismimni yozdirishi mumkin bo‘ladi”, — deydi Kapalova.
Izoh (0)