Meksikada 100 kishi jaziramadan vafot etdi

Meksikada 50 gradusgacha chiqqan anomal issiqlik kamida 100 kishining hayotiga zomin bo‘ldi. Bu haqda Reuters yozmoqda.

Jaziramadan o‘lim holatlari ketma-ket ikkinchi hafta qayd etilmoqda. O‘limlarning taxminan 64 foizi shimoliy Nuevo-Leon shtatida, qolganlari Tamaulipas va Verakrus shtatlarida kuzatilgan.

Deyarli barcha holatlarda o‘lim sababi issiq urishi bo‘lgan. Yana bir necha kishi suvsizlanishdan vafot etgan.

Meksikadagi jazirama to‘lqini elektr tarmog‘ida rekord darajada yuklanishga olib keldi. Mamlakat rasmiylari ayrim hududlarda ta’lim muassasalari faoliyatini to‘xtatdi.

Iyun oyi o‘rtalarida Hindistondagi aholisi eng ko‘p ikki shtatda ham kamida 96 kishi jazirama oqibatida vafot etgani, butun mamlakat issiqdan aziyat chekayotgani haqida xabar berilgandi.

Pokistonda esa mahalliy hokimiyat aholini anomal issiqdan ogohlantirdi. O‘tgan hafta mamlakatning ba’zi hududlarida harorat 50 darajadan oshib ketdi.