“Rostovga yuborilgan jangchilar o‘z vazifalarini a’lo darajada bajarishdi” — Ramzan Qodirov

Checheniston rahbari Ramzan Qodirov o‘zining Telegram kanalida 24-iyun kuni Rostovga jo‘natilgan jangchilarga minnatdorlik bildirdi.

“Men ularning harakatlarini juda samarali va puxta o‘ylangan deb baholayman. Aholi yashaydigan shahardagi har qanday harbiy harakat ommaviy qurbonlarga olib kelishi mumkin edi. Jangchilar qat’iy buyruqqa muvofiq harakat qilishdi va o‘zlariga yuklangan vazifani a’lo darajada bajarishdi”, deb yozdi u.

Rostovga “Axmat” maxsus kuchlari qo‘mondoni Apta Alaudinov va “Sever-Axmat” polki komandiri Zaindi Zingiyev jo‘natilgan edi. Checheniston rahbarining ta’kidlashicha, ularning harbiy amaliyotlar zonasidagi pozitsiyalarini zaxira guruhlari “muvaffaqiyatli egallab turibdi”.

“Xudoga shukr, vaziyat to‘qnashuvlarsiz tugadi. Yigitlarimiz yuqori jangovar shaylik va birinchi buyruqdayoq Vatanni himoya qilishga jasorat ko‘rsatishdi”, — dedi Qodirov.