Ichki ishlar vazirligi akademiyasida bitiruv tadbiri bo‘lib o‘tdi

Ichki ishlar vazirligi akademiyasida kursantlarning bitiruv marosimiga bag‘ishlangan tantanali tadbir bo‘lib o‘tdi.

Unda Ichki ishlar vazirligi rahbariyati, soha faxriylari, ta’lim muassasasi professor-o‘qituvchilari hamda bitiruvchilarning oila a’zolari ishtirok etdi. 

Joriy yil akademiyaning kunduzgi ta’lim yo‘nalishini 7 ta ixtisoslik yo‘nalishi bo‘yicha 600 nafardan ortiq kursant tamomladi. O‘tgan uch yil mobaynida ular o‘zlari tanlagan mutaxassislik bo‘yicha zamon talablari darajasida ta’lim oldi. Mashg‘ulotlar milliy va xorijiy tajribaning ilg‘or yondashuvlari asosida olib borildi. Ta’limning amaliyot bilan uyg‘unligini mustahkamlash maqsadida o‘quv tezkor-tergov guruhlari, hududiy ichki ishlar organlari bilan birgalikda onlayn mahorat mashg‘ulotlari hamda bazaviy amaliyotlar yo‘lga qo‘yildi.  

Tadbirda kunduzgi ta’limni “tezkor-qidiruv faoliyati”, “tergov faoliyati”, “huquqbuzarliklar profilaktikasi faoliyati”, “ekspert-kriminalistika faoliyati”, “xizmat faoliyatini psixologik ta’minlash faoliyati”, “yo‘l harakati xavfsizligini ta’minlash faoliyati”, “jinoiy jazolarni ijro etish faoliyati” mutaxassisliklari bo‘yicha tamomlagan kursantlarga diplomlar tantanali ravishda topshirildi. Ular orasidan 24 nafar kursant imtiyozli diplom, 2 nafari esa “katta leytenant” maxsus unvoni bilan taqdirlandi.