Economist Group tahliliy bo‘limi tomonidan e’lon qilingan reytingda Avstriya poytaxti Vena yana yashash uchun eng qulay shahar deb topildi.
Qayd etilishicha, Vena bir necha yillardan beri birinchi o‘rinni egallab kelmoqda. Bu yil yashash uchun eng qulay shaharlar 10 taligiga Kopengagen, Melburn, Sidney, Vankuver, Syurix, Kalgari, Jeneva, Toronto, Osaka va Oklend ham kirdi.
Kiyev “barqarorlik va infratuzilmaga yetkazilgan zarar” tufayli reytingda 165-o‘rinni egalladi.
Reytingning quyi qismidagi so‘nggi 10 o‘rinni Damashq, Tripoli, Jazoir, Lagos, Karachi, Port-Morsbi, Dakka, Xarare, Kiyev va Duala egallagan.
Yangi Zelandiyaning Vellington va Oklend, Avstraliyaning Pert va Ruminiyaning Buxarest shaharlari o‘tgan yilga nisbatan reytingda eng ko‘p o‘sishga erishgan. Eng ko‘p pasayish esa Edinburg, Stokgolm, Los-Anjeles va San-Diego shaharlarida kuzatildi.
Tadqiqotchilarning ta’kidlashicha, reyting dunyoning turli shaharlaridagi eng yaxshi va eng yomon yashash sharoitlarini baholash asosida tuzilgan. Ularga ko‘ra, barqarorlik, sog‘liqni saqlash, madaniyat, atrof-muhit, ta’lim va infratuzilma toifalari bo‘yicha 30 dan ortiq omillar baholanmoqda.
Izoh (0)