Navoiy viloyatining Navoiy shahrida Obodonlashtirish boshqarmasi boshlig‘i lavozimida ishlab, davlatning 1 milliard 53 million so‘m miqdoridagi mablag‘ini talon-toroj qilgan mansabdor Yusuf Tursunov yana boshqarma boshlig‘i lavozimiga qaytdi. Bu haqda Navoiy shahri hokimi M.Egamqulovning 2023-yil 21-iyun kuni imzolangan qarorida maʼlum qilingan.
Qarorda Tursunov ushbu lavozimga uch oylik sinov muddati bilan tayinlangani qo‘shimcha qilingan.
“Daryo” davlat pulini o‘zlashtirishda ayblangan Yusuf Tursunovning yana aynan o‘sha lavozimga qaytish sababini aniqlash maqsadida qaror ijrosini taʼminlashga mas’ul bo‘lgan, hokimlikning tashkiliy kadrlar guruhi rahbari Shahobiddin Xolboyev bilan suhbatlashdi.
Jurnalist Shahobiddin Xolboyevga “aynan shu lavozimda ishlagan paytida davlat mablag‘ini o‘zlashtirgan mansabdorni yana aynan o‘sha lavozimga qaytarish qanchalik mantiqli”, degan savolga javob berar ekan “Men Sizning savolingizga aniq javob berishim uchun holatni batafsil o‘rganib, bu haqda rasmiy munosabat ham beramiz“, dedi.
Shahobiddin Xolboyev jurnalist savoliga javob berishdan tiyilar ekan Yusuf Tursunov bu lavozimga uch oylik sinov muddati bilan tayinlanganini, uni bu lavozimga tayinlashda sudning avvalgi qarorlaridagi jazo turi va muddati o‘talgani hisobga olinganini qo‘shimcha qildi.
Kezi kelganda taʼkidlash kerakki, sud hukmiga ko‘ra, Yusuf Tursunov 2019-yilda boshqarma bosh hisobchisi U.Xafizov, “Paradise System Servise” MCHJ mansabdor shaxslari bilan jinoiy til biriktirib, 690 dona ko‘cha chirog‘ini sotib olish uchun jami 997 million so‘m mablag‘ni jamiyat hisob raqamiga ko‘chirgan. Aniqlanishicha, mazkur turdagi chiroqning bir donasi 384 ming so‘m bo‘lgan, mansabdor esa chiroqning har biriga 1 million 240 ming so‘mdan pul to‘lab, ushbu mablag‘ning 732 million so‘mini talon-toroj qilgan.
Shuningdek, u donasi 384 ming so‘m bo‘lgan 700 dona Slatek LED Street Light-200W ko‘cha chirog‘i 650 ming so‘mdan hamda har birining donasi 272,2 ming so‘m bo‘lgan 650 dona Energomax EMX-0103/150W ko‘cha chirog‘ini 480 ming so‘mdan sotib olib, bu safar 321 million 220 ming so‘mni “yeb ketgan”.
Yusuf Tursunov jinoyat ishlari bo‘yicha Navoiy shahar sudining 2021-yil 4-martdagi hukmiga asosan, Jinoyat kodeksining 167-moddasi 3-qismi “a” bandi va 209-moddasi 2-qismi “a” bandi bilan aybli deb topilib, Jinoyat kodeksining 45-moddasi qo‘llangan holda 1 yil 6 oy mansabdorlik va moddiy javobgarlik ishlarida ishlash huquqidan mahrum qilinib, oylik ish haqining 10 foizini davlat daromadiga ushlab qolgan holda 3 yil axloq tuzatish ishlari jazosiga tortilgan. Navoiy viloyat sudi jinoyat ishlari bo‘yicha sudlov hayʼati apellyatsiya instansiyasining 2021-yil 18-avgustdagi ajrimi bilan birinchi instansiya sudi hukmiga qisman o‘zgartirish kiritilib, Yusuf Tursunovga tayinlangan axloq tuzatish ishlari jazosi muddati 3 yildan 2 yil 7 oyga qisqartirilgan. Mansabdorlik va moddiy javobgarlik ishlarida ishlash huquqidan mahrum qilish tarzidagi qo‘shimcha jazo o‘zgarishsiz qoldirilgan.
Izoh (2)
зур
яхшику