Germaniya prezidenti Frank-Valter Shtaynmayer 22-iyun, payshanba kuni rasmiy tashrif bilan Qirg‘izistonga keldi. Qirg‘iziston prezidenti Sadir Japarov uni prezident saroyida kutib oldi. Qozog‘istondagi kabi Qirg‘izistonda ham Shtaynmayer Germaniya respublikaga o‘zini hamkor sifatida ko‘rsatish va ikki tomonlama munosabatlarni rivojlantirishga tayyorligini ta’kidlamoqchi.
DPA agentligiga ko‘ra, Germaniya prezidenti o‘zini an’anaviy ravishda Markaziy Osiyo mintaqasida katta rol o‘ynaydigan Rossiya va Xitoyga muqobil variant sifatida taklif qilmoqda.
Bishkekka kelgach, Shtaynmayer Qirg‘izistonga tashrifining katta qismi Ukrainadagi urush, uning Markaziy Osiyo va Yevropa mamlakatlari, jumladan, Germaniya uchun oqibatlarini muhokama qilishga bag‘ishlanishi mumkinligini aytdi.
Shtaynmayer Germaniya Qirg‘iziston mustaqilligini birinchilardan bo‘lib tan olganini eslatdi.
“Bizda 30 yildan ortiq vaqtdan beri juda barqaror munosabatlar bor, ular jadal rivojlanmoqda, ikki tomonlama tashriflarimiz buning dalilidir”, — dedi Germaniya prezidenti.
Bu Frank-Valter Shtaynmayerning Qirg‘izistonga uchinchi tashrifidir.
Iqtisodiy nuqtayi nazardan Qirg‘iziston noyob metallar va oltinning boy zaxiralariga ega mamlakat sifatida Germaniyani qiziqtiradi.
Qirg‘iziston prezidenti Sadir Japarov, o‘z navbatida, Bishkek Germaniya bilan faol hamkorlikni davom ettirish tarafdori ekanini, Germaniya nafaqat Yevropa, balki butun dunyoda yetakchi davlatlardan biriligini ta’kidladi.
“Germaniya o‘zining siyosiy nufuzi va iqtisodiy salohiyati tufayli dunyoning ko‘plab davlatlari, jumladan, Qirg‘iziston uchun ham namunadir”, — dedi Japarov. “Biz demokratik qadriyatlar, asosiy erkinliklar va inson huquqlariga hurmat bilan qaraymiz, ular Germaniyada ham yuksak qadrlanadi. Mamlakatimizni demokratik rivojlantirish, kuchli fuqarolik jamiyati va huquqiy tizimni barpo etishda Germaniya qo‘llab-quvvatlovi biz uchun juda muhim.
Germaniya prezidenti, Qirg‘izistondan avval Qozog‘istonga tashrif buyurgandi. U yerda prezident Qosim-Jo‘mart To‘qayev bilan muzokaralar o‘tkazgan. To‘qayev Frank-Valter Shtaynmayer bilan qo‘shma matbuot anjumanida Ukrainada o‘t ochishning to‘xtatilishiga umid bildirdi va bunga erishish uchun Ostona qo‘lidan kelgancha hissa qo‘shishga tayyorligini aytdi.
Izoh (0)