Toshkent shahrida 19-iyun kuni bo‘lib o‘tgan TURKSOY tashkilotining 30 yilligiga bag‘ishlangan tadbirda bir guruh jamoa arboblari, madaniyat va sanʼat xodimlari “Oltin medal” mukofoti bilan taqdirlandi. Bu haqda “Daryo” muxbiri xabar bermoqda.
Xalqaro turkiy madaniyat tashkiloti – TURKSOYning 30 yillik yubiley tantanalari 18–19-iyun kunlari bo‘lib o‘tdi. Yubiley tantanalarida qatnashish uchun turkiy tilli davlatlardan 150 nafar madaniyat va sanʼat xodimi ishtirok etdi.
Marosimda o‘zbek madaniyati va sanʼatini dunyo miqyosida targ‘ib qilishga munosib hissa qo‘shganligi uchun bir guruh sanʼatkorlar tashkilotning “Oltin medal” mukofoti bilan taqdirlandi:
- Madaniyat va turizm vaziri Ozodbek Nazarbekov;
- Professor Baxtiyor Sayfullayev (marhum)
- O‘zbekiston xalq artisti Sherali Jo‘rayev;
- O‘zbekiston Badiiy akademiyasi raisi Akmal Nuriddinov;
- Yozuvchilar uyushmasi raisi Sirojiddin Saidov;
- O‘zbekiston xalq artisti Yodgor Sa‘diyev;
- O‘zbekiston xalq artisti Yulduz Usmonova.
Shuningdek, bir guruh madaniyat va san‘at xodimlari tashkilotning “30 yillik” ko‘krak nishoni bilan taqdirlandi.
Ma’lumot uchun, Xalqaro turkiy madaniyat tashkiloti (turk. International Türk Kültürü Teshkilati, TURKSOY) – turkiy tillar oilasiga mansub tillarda so‘zlashuvchi turkiy aholi yashaydigan mamlakatlarning xalqaro madaniy tashkilotidir.
TURKSOY sobiq rasmiy ismining qisqartirilishidan kelib chiqqan, ya’ni “Turk Kültür ve Sanatları Ortak Yönetimi”. Turkiy tillar – bu Sharqiy Yevropa, Kavkaz, Markaziy Osiyo va G‘arbiy Osiyodan Shimoliy Osiyo (xususan Sibir) va Sharqiy Osiyoga qadar Yevrosiyoning turkiy xalqlari so‘zlashadigan kamida 35 hujjatlashtirilgan tillarning oilasi hisoblanadi. Ana shu turkiy tilda so‘zlashuvchi ba’zi davlatlar TURKSOY tashkilotini tuzgan.
1992-yilda Boku va Istanbulda bo‘lib o‘tgan uchrashuvlarda Ozarbayjon, Qozog‘iston, Qirg‘iziston, O‘zbekiston, Turkiya va Turkmaniston madaniyat vazirlari madaniy doirada birga hamkorlik qilishga sodiq ekanliklarini bildirishgan. Keyinchalik TURKSOY 1993-yil 12-iyulda Olmaotada imzolangan bitim asosida tashkil etilgan. TURKSOY turkiy xalqlar o‘rtasidagi madaniy aloqalarni mustahkamlash bo‘yicha faoliyat olib boradi.
Izoh (0)