Toshkentdagi Intercontinental mehmonxonasida Vengriyaning OTP banki tomonidan Ipoteka bankni sotib olishning birinchi bosqichi yakunlanishiga bag‘ishlangan matbuot anjumani o‘tkazildi. Unda iqtisodiyot va moliya vaziri o‘rinbosari Ilhom Norqulov, OTP Bank boshqaruvchilar kengashi raisi o‘rinbosari Laslo Vulf hamda Ipoteka bank boshqaruvi raisi Elyor Inomjonov ishtirok etdi.
Tadbir davomida bankni xususiylashtirish jarayonlari va kelgusida amalga oshirilishi rejalashtirilayotgan ishlar haqida ma’lumot berildi. Taʼkidlanishicha, OTP Bank jismoniy filiallar va raqamli banking afzalliklarini birlashtirgan gibrid model bo‘yicha rivojlanishni rejalashtirmoqda.
Anjuman ishtirokchilarining ma’lumot berishicha, Vengriya OTP banki Ipoteka bankni sotib olishning birinchi bosqichi yakunlangan bo‘lib, 75 foiz ulushga ega asosiy aksiyadorga aylangan. OTP bank yaqin uch yil ichida Ipoteka bankning 25 foiz ulushini qo‘lga kiritish va O‘zbekiston bankidagi ulushini 98 foizga yetkazish niyatida. O‘zbekiston OTP guruhi faoliyatini boshlagan Markaziy Osiyodagi ilk mamlakatga aylandi.
Mazkur bitim O‘zbekiston banklari uchun g‘arb mamlakatlari ishtirokida amalga oshirilgan birinchi xususiylashtirish jarayoni hisoblanadi.
Vengriya banki 2020-yil oxiridan boshlab O‘zbekiston bank sektorini xususiylashtirishda ishtirok etish imkoniyati bo‘yicha muzokaralar olib borgan. 2021-yilning kuzida bo‘lib o‘tgan uchrashuvlar natijasida tomonlar Ipoteka bankni sotib olish imkoniyati bo‘yicha o‘zaro anglashuv memorandumini imzolagan.
Ipoteka bankni sotib olish bo‘yicha shartnoma 2022-yil dekabr oyida imzolangan. Bitim miqdori 324 million dollarni tashkil etgan.
Ma’lumot uchun, Ipoteka bank O‘zbekistondagi beshinchi yirik bank hisoblanadi. Bank respublika umumiy bozorining 8,5 foizini egallagan, mijozlari soni 1,6 million kishini tashkil qiladi.
Reklama huquqi asosida.
Izoh (0)