Yevropa Chempionlar Ligasida 2022/23-yilgi mavsumning eng yaxshilari aniqlandi

Yevropa Chempionlar Ligasi 2022/23-yilgi mavsumining eng yaxshi futbolchisi, eng yaxshi yosh o‘yinchisi va ramziy jamoasi e’lon qilindi.

Chempionlar Ligasida mavsum ramziy jamoasidan faqatgina “Manchester Siti”, “Inter” va “Real Madrid” futbolchilari o‘rin oldi.

Darvozabon: Tibo Kurtua (“Real Madrid”);

Himoyachilar: Federiko Dimarko, Alessandro Bastoni (ikkisi – “Inter”), Ruben Diash, Kayl Uoker (ikkisi – “Manchester Siti”);

Yarim himoyachilar: Rodri, Jon Stounz, Kevin de Bruyne (barchasi – “Manchester Siti”);

Hujumchilar: Vinisius Junior (“Real Madrid”), Bernardu Silva, Erling Holand (ikkisi – “Manchester Siti”).

“Manchester Siti” yarim himoyachisi Rodri Yevropa Chempionlar Ligasi 2022/23-yilgi mavsumining eng yaxshi o‘yinchisi deb topildi. Turnir davomida yarim himoyachi 12 ta o‘yin o‘tkazib, ikkita to‘p kiritdi.

Ma’lumot uchun, Rodri jamoasining finaldagi yagona goliga mualliflik qildi. Futbolchining musobaqadagi uzatmalari aniqligi 93,8 foizni tashkil etdi.

“Napoli” hujumkor yarim himoyachisi Xvicha Kvaratsxeliya esa Chempionlar Ligasi 2022/23-yilgi mavsumining eng yaxshi yosh futbolchisi nomiga loyiq ko‘rildi. Vinger Neapol klubi bilan chorak finalgacha yetib bordi. Turnir davomida to‘qqizta o‘yin o‘tkazib, ikkita gol urgan va to‘rtta golli uzatma amalga oshirgan.