Toshkent shahridagi Chorsu va Eski jo‘va dehqon bozorlari hududi tartibga keltirilib, turistik jozibadorligi oshiriladi.
Prezidentning “2023—2024-yillarda Toshkent shahrining Shayxontohur tumanini ijtimoiy-iqtisodiy rivojlantirish va mahallalar infratuzilmasini yaxshilashga doir qo‘shimcha chora-tadbirlar to‘g‘risida”gi qarorida belgilanishicha, bozor hududidagi tartibsiz qurilmalar o‘rniga loyiha asosida zamonaviy savdo rastalari joylashtiriladi.
Davlat-xususiy sherikchilik shartlari asosida ko‘pqavatli avtoturargoh tashkil etiladi. Piyodalar yo‘laklari qurilib, irrigatsiya tarmoqlari yangilanadi.
Bundan tashqari, bo‘sh turgan bino-inshootlar milliy arxitektura ishlanmalarini aks ettirgan loyihalar asosida rekonstruksiya qilinib, yer maydonlarida yangi savdo rastalari quriladi.
Belgilangan choralar 2023-yilning yakuniga qadar bank kreditlari, dehqon bozorlari mablag‘lari hisobiga amalga oshiriladi.
Hujjat bilan 2024-yil yakuniga qadar davlat-xususiy sherikchilik shartlari asosida O‘zbekiston davlat sirki binosi rekonstruksiya qilinishi ham belgilangan.
Izoh (0)