“Spetsiya” qo‘shimcha o‘yinda “Verona”ga yutqazib, A Seriyani tark etdi. Shomurodov assist qayd etdi va penalti ishlab berdi (video)

Italiya A Seriyasida qolish uchun kechgan bahsda “Spetsiya” 11-iyun, yakshanba kuni “Verona”ga qarshi bahs olib bordi.

Jamoalar A Seriya mavsumi yakunlariga ko‘ra 38 turda 31 ochkodan jamg‘ardi va mos ravishda 17 hamda 18-pog‘onalarni band etdi. Ushbu mavsumdan boshlab kuchga kirgan reglamentdagi qoidaga ko‘ra, ligada qolish uchun kurashayotgan jamoalar bir xil ochko to‘plagani bois qo‘shimcha o‘yin belgilandi.

Uchrashuvning 5-daqiqasida Davide Faraoni veronaliklarni oldinga olib chiqdi. 15-daqiqada Eldor Shomurodovning uzatmasidan keyin Itan Ampadu gol urib, muvozanatni tikladi. Birinchi bo‘limda “Verona” vakillari yana ikkita to‘p kiritishga muvaffaq bo‘ldi.

68-daqiqada Shomurodov raqib darvozaboni bilan birga-bir vaziyatga chiqib bordi va to‘pni uning ustidan oshirib darvoza tomon yo‘lladi. Biroq Faraoni so‘nggi lahzada to‘pni qo‘li bilan qaytarib, maydondan chetlatildi. Belgilandan penaltini Mbala Nzola muvaffaqiyatli amalga oshira olmadi. Qolgan vaqtda hisob o‘zgarishsiz qoldi.

Shu tariqa “Spetsiya” A Seriyadagi uch mavsumdan keyin quyi ligaga ravona bo‘ldi.

A Seriya

Qo‘shimcha o‘yin

11-iyun, yakshanba

“Spetsiya” – “Verona” 1:3

Gollar: 0:1 – 5 Faraoni, 1:1 – 15 Ampadu, 1:2 – 26 Ngonj, 1:3 – 38 Ngonj.

“Spetsiya”: Drongovski, Ferrer (Agudelo, 83), Nikolau, Ampadu, Visnevski (Verde, 53), Retsa, Burabiya, Jurkovski (Kovalenko, 65), Espozito (Sipot, 83), Shomurodov, Nzola.

“Verona”: Montipo, Faraoni, Davidovich (Kabal, 59), Manyani (Koppola, 85), Hin, Depaoli, Lazovich (Verdi, 59), Tamez, Sulemana, Ngonj (Terrachchano, 76), Jurich (Gaych, 76).

Ogohlantirishlar: Hin (14), Depaoli (28), Davidovich (31), Montipo (66), Ngonj (70), Retsa (71), Espozito (77).

Chetlatish: Faraoni (68).