Afrikaning Ruanda davlatidagi genotsid paytida yuzlab odamlarning hayotini saqlab qolgan Damas Gisimba 61 yoshida vafot etdi. 800 ming kishi qirg‘in qilingan genotsid paytida Gisimba va ukasi boshqaradigan mehribonlik uyi ko‘pchilik uchun boshpanaga aylangan edi, deb yozadi The Guardian.
1994-yil 6-aprel kuni Ruanda prezidenti Jyuvenal Xabiarimana o‘tirgan samolyot urib tushirilgan, uning o‘limida tutsi isyonchilari ayblangan edi. Bir necha soat ichida poytaxt Kigali o‘rab olinib, xutu kuchlari tomonidan tutsi oilalarini qirg‘in qilish boshlangan. Ertasi kuni odamlar boshpana izlab bolalar uyiga kela boshlagan. Shundan keyingi uch oy davomida Gisimba chodirda, podvalda va xonalarda yashiringan 400 dan ortiq bolalar va kattalarni himoya qilgan.
“Men va oilamning tirik qolishi sababchisi — Damas Gisimba. 1994-yilgi genotsid paytida biz mehribonlik uyida yashadik. U bizning oilamizni qabul qildi, hayotimizni saqlab qoldi”, — deydi genotsid guvohlaridan biri.
U Qizil Xoch yuborgan yeguliklar yordamida odamlarni bir necha oy boqqan va militsiya bilan mehribonlik uyining omon qolishi haqida muzokaralar olib borgan. Gisimba, shuningdek, uy yaqinida qazilgan ommaviy qabrdan ikki chalajon ayolni olib chiqqan.
Genotsiddan keyin ota-onasidan ayrilgan bolalar yordam izlab mehribonlik uyiga kelishda davom etdi. Moddiy qiyinchiliklarga qaramay, Gisimba ularga g‘amxo‘rlik qildi, ovqatlantirdi, maktabga qatnashini ta’minladi.
Gisimba genotsid paytidagi xizmatlari uchun mamlakat prezidentining Umurinzi (himoyachi) ordeni bilan taqdirlangan.
U hayotining so‘nggi yillarini gipertoniya va buyrak muammolari bilan o‘tkazdi. Raunda qahramoni 11-iyun kuni Kigalidagi uyida vafot etdi.
Izoh (0)