Dam olish kunlari harorat biroz pasayganidan so‘ng, ushbu haftada harorat asta-sekin ko‘tarila boshlaydi, deb xabar bermoqda “O‘zgidromet”.
Qayd etilishicha, O‘zbekiston bo‘yicha o‘rtacha issiq ob-havo saqlanib turadi. Haftaning ikkinchi yarmida kunduzi havo 37-40 darajagacha, janubda va cho‘l hududlarda ba’zi joylarda 41-42 darajagacha isiydi. Bu iyun oyining o‘rtasi uchun ekstremal qiymatlar emas, ammo bu davrning iqlimiy qiymatlaridan yuqoridir.
Respublika hududi bo‘yicha ushbu hafta davomida ob-havo asosan yog‘ingarchiliksiz bo‘lishi kutilmoqda, faqat Farg‘ona vodiysi viloyatlarida, shuningdek, tog‘oldi va tog‘li hududlarda 12–13-iyun kunlari ba’zi joylarda qisqa muddatli yomg‘ir yog‘ishi va momaqaldiroq bo‘lishi mumkin.
12–13-iyun kunlari respublika bo‘yicha ba’zi joylarda shamol tezligi 15-20 metr/sekundgacha kuchayishi, ayrim joylarda chang-to‘zon bilan kuzatilishi mumkin.
Toshkentda ushbu haftada havo biroz bulutli bo‘ladi, vaqti-vaqti bilan o‘zgarib turadi, yog‘ingarchilik kutilmaydi. Shamol sharqdan 3-8 metr/sekund tezlikda esadi, 12–13-iyunda 10 metr/sekundgacha kuchayishi mumkin. Harorat asosan kechasi 23-25 daraja, kunduzi 37-39 daraja bo‘ladi.
Izoh (0)