Tojikiston poytaxti Dushanbe shahrida 8-iyun kuni Markaziy Osiyodagi eng yirik masjidlardan birining tantanali ochilish marosimi bo‘lib o‘tdi. Bu haqda “Xovar” xabar berdi.
Rasmiy ochilish marosimidan so‘ng masjidga Imomi A’zam – Abu Hanifa No‘mon ibn Sobit nomini berish taklif qilingan. Ochilish marosimida Tojikiston prezidenti Imomali Rahmon va davlat tashrifi bilan respublikada bo‘lib turgan Qatar amiri shayx Tamim ibn Hamad al-Soniy ishtirok etgan.
Yangi masjid hovlisi 12 gektar maydonni egallaydi, asosiy bino uch gektar va unga uchta darvozadan kiriladi. Masjid bir vaqtning o‘zida 133 ming kishini sig‘dira oladi, shundan 43 ming kishi bino ichida, qolgani uning atrofida joylashishi mumkin.
“Bu nafaqat masjid, balki islom madaniyati va tarixining zamonaviy poydevoridir, masjid zallari shunday qurilganki, ularda turli darajadagi ilmiy-madaniy tadbirlar, turli darajadagi anjumanlar o‘tkaziladi”, — deya ta’kidlaydi “Xovar”.
Bo‘lajak masjid poydevoriga birinchi tamal toshi 2009-yil 5-oktabrda hanafiy ta’limotining asoschisi va yetakchisi Abu Hanifa No‘mon ibn Sobit tavalludining 1310 yilligini nishonlash chog‘ida qo‘yilgan edi.
Qurilish 2011-yil 5-oktabrda boshlangan va 2019-yil kuzida yakunlangan. Ochilish marosimi 2020-yilning mart oyida bo‘lib o‘tishi kerak edi, biroq koronavirus pandemiyasi tufayli u qoldirildi. Fevral oyida Tojikiston Din ishlari, milliy an’analar, bayram va marosimlarni tartibga solish qo‘mitasi marosim Qatar amirining tashrifi chog‘ida bo‘lib o‘tishini ma’lum qildi.
Masjid loyihasi deyarli 100 million dollarga tushgan, shundan 30 million dollari Tojikiston hukumati, 70 million dollari Qatar hukumati tomonidan ajratilgan.
Izoh (0)