Jizzax shahrida sevgan qizini yalang‘och rasmlarini kanallarda tarqatish bilan qo‘rqitgan yigit qo‘lga olindi, deb xabar beradi IIV Kiberxavfsizlik markazi.

Qayd etilishicha, Jizzax shahrida yashovchi Sh.S. ismli qiz IIBga sevgan yigiti uning yalang‘och holdagi video va foto tasvirlarini ijtimoiy tarmoqlarda tarqatib yubormaslik evaziga 800 dollar talab qilayotganini maʼlum qilgan.

O‘rganishlar natijasiga ko‘ra, yigit Jizzax shahrida yashovchi 19 yoshli O.R. ekani, u Sh.S. bilan sevishib, ishqiy munosabatda bo‘lgan vaqtlarida unga uylanish istagi borligini aytib, ishonchiga kirish orqali yashirin tarzda uni kiyimsiz holatda foto va video tasvirga olgani aniqlangan.

Oradan bir qancha vaqt o‘tgach, O.R. sevgan qizi Sh.S.ni boshqa yigit bilan unashtirilganini eshitganidan so‘ng, o‘zida mavjud bo‘lgan uyatli videotasvir va rasmlarini g‘arazli maqsadda Telegram messenjeridagi kanallarga tarqatib yuborib, nikoh to‘yini buzish bilan qo‘rqitgan. Shuningdek, Sh.S.ning uyatli video-foto tasvirlarini o‘chirish evaziga g‘arazgo‘ylik bilan 800 dollar talab qilgan.

O‘tkazilgan tadbirlar natijasida, O.R. kelishilgan pulning bir qismi sifatida taqdim etilayotgan 4 million so‘m pullarni olgan vaqtida qo‘lga olingan.

Mazkur holat yuzasidan Jinoyat kodeksining 165-moddasi (tovlamachilik) 1-qismi bilan jinoyat ishi qo‘zg‘atilgan. Qonunga muvofiq, O.R. tomonidan sodir etilgan jinoiy harakatlar uchun 3 yildan 5 yilgacha ozodlikdan mahrum qilish jazosi nazarda tutilgan.  

Mart oxirlarida Andijonda talaba qizning shaxsiy suratlarini ijtimoiy tarmoqlarda tarqatmaslik uchun pul talab qilgan shaxs ushlangani, shuningdek, Samarqandda erkak “Odnoklassniki”da tanishgan ayolning suratlarini montaj qilib, tarqatish bilan tahdid qilgani to‘g‘risida xabar berilgandi. Bir necha kun oldin Toshkent viloyatida 19 yoshli qizning suratlarini tarqatish bilan tahdid qilgan yigit qo‘lga olingandi.