Shavkat Mirziyoyevning Italiyaga tashrifi doirasida o‘tkazilgan biznes forum davomida “Issiqlik elektr stansiyalari” va Italiyaning SACE kredit agentligi o‘rtasida uchta yirik shartnoma va bitta memorandum imzolandi. Bu haqda “Issiqlik elektr stansiyalari” matbuot xizmati xabar qildi.
Ularga ko‘ra, jami 2 milliard 263,3 million yevroga teng to‘rtta yirik loyiha, shu jumladan, Toshkent IESni modernizatsiya qilish, poytaxtning 6 ta tumanida gaz porshenli qurilma va suv isitish qozonlarini qurish loyihasi, Yunusobod tumanidagi 4-Issiqlik markazi hududida har birining quvvati 4,3 megavattga teng 24 ta gazporshenli qurilma va har birining quvvati 130 megavattga teng bo‘lgan 4 ta suv isitish qozonlarini bunyod etish ishlari amalga oshiriladi.
Memorandumga asosan esa 1-, 3-, 5-, 6-, 7-, 8-, 9-, 10-issiqlik markazlarida kogeneratsion qurilmalar barpo etish orqali poytaxt aholisini qo‘shimcha issiqlik va elektr energiyasi bilan taʼminlash imkoni yaratiladi. Mazkur loyiha ham EPC+F, yaʼni qurish va to‘liq ishga tushirish darajasida moliyalashtirish shartiga asoslangan. Loyihalarning har biri isteʼmolchilariga barqaror, sifatli elektr va issiqlik energiyasi yetkazib berishga qaratilgan.
“Birgina Toshkent IESni modernizatsiya qilishga oid kelishuvga ko‘ra, stansiyaning mavjud quvvatini 990 MVtga oshirish kutilyapti. Bunda tabiiy gazni zamonaviy bug‘-gaz qurilmalari hisobiga kombinatsiyalashgan siklda samarali yoqishni tashkil etish, elektr va issiqlik energiyasini ishlab chiqarish jarayoniga bosqichma-bosqich zamonaviy va yuqori samarador texnologiyalarni joriy etish orqali ko‘rsatkichlarni oshirish, Toshkent viloyati sanoat korxonalari va uy-joy kommunal xo‘jaliklarini ishonchli elektr energiyasi bilan taʼminlash belgilangan. Umumiy qiymati 544,5 million yevroni tashkil etadigan loyiha asosida hududning ijtimoiy sohalarini yanada rivojlantirish va yangi ish o‘rinlarini yaratish rejalashtirilgan”, — deyiladi xabarda.
Ma’lum qilinishicha, yuqorida keltirilgan to‘rtta loyiha ham Vazirlar Mahkamasining 2023-yil 13-yanvardagi 13-son “Toshkent shahri markazlashgan issiqlik taʼminoti korxonalari faoliyatini takomillashtirish to‘g‘risida”gi qarori ijrosiga qaratilgan.
Prezident Shavkat Mirziyoyev rasmiy tashrif bilan Italiyada bo‘lib turibdi. Shu kuni Rim shahridagi rasmiy tadbirlar dasturiga muvofiq, Shavkat Mirziyoyev Kiji saroyida Italiya Vazirlar kengashi raisi Jorja Meloni bilan muzokara o‘tkazdi.
Yetakchilar huzurida ko‘p qirrali hamkorlikni kengaytirishga qaratilgan 10 ta hukumat va idoralararo hujjatlarni almashish marosimi ham bo‘ldi. Investitsiyalarni o‘zaro rag‘batlantirish va himoya qilish to‘g‘risidagi bitim, huquqiy masalalarda, sanoat mulki va qishloq xo‘jaligi sohalarida hamkorlik qilish to‘g‘risidagi bitimlar shular jumlasidan.