Qozog‘istonlik imom va ilohiyot olimi Nurlan Bayjigituli “to‘qollar” (ikkinchi xotin yoki kichik xotin) va ko‘pxotinlilik haqida o‘z fikrini bildirdi.

U agar erkak uylanmoqchi bo‘lsa, birinchi, ikkinchi, uchinchi xotin bo‘ladimi, farqi yo‘q — buni yashirmasligi kerak deb ta’kidladi. Bu haqida “Daryo” muxbiri Tengri Life nashriga tayanib xabar bermoqda.

“Hozir biz ko‘rayotgan narsa – birinchi xotindan yoki jamoatchilikdan yashirib oila qurish, insonning noto‘g‘ri hayot tarzini olib borayotganini anglatadi. Chunki ikkinchi bo‘lib erga tekkan ayolni endi hech kim va hech narsa himoya qilmaydi. Shuning uchun baribir birinchi xotinning ruxsati kerak. Garchi Islom dini buni talab qilmasa-da”, — deydi imom.

Nurlan Bayjigituli ayollar erining ikkinchi xotini borligini bilib qolgan vaziyatlarga ko‘p duch keladi.

“Bu fonda oila parchalanadi. Bolalar begona bo‘lib qoladilar, jamiyatda o‘z o‘rinlarini topib ketishlari qiyin bo‘ladi. Demak, bu katta muammo. Umuman, Qur’oni karimda bu haqda juda chiroyli oyat bor. Alloh taolo Qur’onda: ‘...o‘zingizga yoqqan ayollardan ikkitami, uchtami, to‘rttami nikohlab oling. Agar adolat qila olmaslikdan qo‘rqsangiz, bittani (oling)...’, – dedi. Yurtimizdagi ko‘p erkaklar esa bu muqaddas oyatning ko‘pxotinlilik haqida so‘z yurituvchi birinchi qisminigina o‘rganadilar va shu bilan to‘xtab qoladilar” — dedi imom.

Nurlan Bayjigituli qozog‘istonliklarga oilaviy rishtalarni saqlashni maslahat berdi, chunki bu eng muhimi.

“Agar biror erkak ikkinchisiga uylanmoqchi bo‘lsa, bu oshkora bo‘lishi kerak. Shu bilan birga, boy bo‘lishi kerak, toki ularni boqib, barcha zarur narsalar bilan ta’minlay olsin”, — deya xulosa qildi Nurlan Bayjigituli.

Eslatib o‘tamiz, Qozog‘istonda ko‘pxotinlilik taqiqlangan. Normalar “Nikoh va oila to‘g‘risida”gi qonunda belgilab berilgan. Bunda nikoh bir erkak va bir ayol o‘rtasidagi teng huquqli ittifoq ekanligi belgilangan. Shunga ko‘ra, Qozog‘iston Respublikasi qonuniga ko‘ra, erkak bir necha xotinga ega bo‘lishi mumkin emas.

Shu bilan birga, ko‘pxotinlilik uchun ma’muriy yoki jinoiy javobgarlik nazarda tutilmagan. Shu bilan birga Qozog‘iston dunyoviy davlat ekanligini ta’kidlash kerak. Ya’ni, din davlatdan ajratilgan.

Talgat Sotiboldi, Ostona