“Ukrgidroenergo” rahbari Igor Sirotaning aytishicha, Kaxovka GES o‘rnida yangi stansiya qurish kamida besh yil vaqt oladi va kamida bir milliard grivna(27 million dollar)ga tushadi. Uning bayonotini GES shtab-kvartirasi matbuot xizmati chop etdi.
“Yangi stansiya qurish uchun 24/7 rejimida ishlaganda kamida 5 yil kerak. Vayronagarchilikning to‘liq ko‘lamini haligacha bilmaymiz: nafaqat stansiya, balki o‘tish joylari, suv ta’minoti, gaz ta’minoti ham zarar ko‘rgan. Bu murakkab gidroelektr majmuasi, uni yaxshilash vaqt talab etadi”, — dedi Sirota.
Uning so‘zlariga ko‘ra, qurilish urush tugaganidan keyin boshlanishi mumkin, hozir bo‘lsa buzilgan to‘g‘onni qayta berkitib, aholi, qishloq xo‘jaligi va sanoatni suv bilan ta’minlash zarur.
Sirotaning qo‘shimcha qilishicha, “Ukrgidroenergo” xodimlari okkupatsiyadan keyin Kaxovka suv omborini imkon qadar tezroq to‘ldirish uchun suv omborlarining yuqori qismiga suv g‘amlaydi.
6-iyun kuni ertalab Kaxovka GESning to‘g‘oni buzildi. Rossiya bunga Ukrainaning o‘qqa tutishlari sabab bo‘lganini da’vo qilmoqda. Kiyev Rossiya harbiylari to‘g‘onni portlatganini aytmoqda. Bundan tashqari, Kaxovka suv omboridagi avvalgi vayronagarchiliklar va suv sathining ko‘tarilishi tufayli to‘g‘on o‘z-o‘zidan qulagan bo‘lishi mumkinligi haqida taxminlar bor. GES joylashgan okkupatsiyadagi Novaya Kaxovka shahrining Rossiya tomonidan tayinlangan “meri” Vladimir Leontyev sohilbo‘yi hududlarini suv bosishi oqibatida Xersonning besh fuqarosi halok bo‘lganini aytdi.
Izoh (0)