“Daryo” internet nashrida “Prezident topshirig‘i bilan tut bargidan choy ishlab chiqarishga kirishgan buxorolik tadbirkor muammolarga duch kelmoqda. U Oliy suddan yordam so‘radi”, sarlavhali maqola eʼlon qilingan edi. Mazkur maqolaga munosabat bildirgan Oliy sud axborot xizmati mazkur ish Oliy sudda ko‘rilayotganini maʼlum qildi.
“Joriy yil 12-may kuni Qarshi shahrida bo‘lib o‘tgan sayyor qabul chog‘ida Bukhara Melburry Tea Silk Worm MCHJ vakili Oliy sud raisi Baxtiyor Islomovning qabulida bo‘lib, o‘z shikoyatini topshirgan. Ayni vaqtda ushbu shikoyat Oliy sudda belgilangan tartibda o‘rganilayotganligi maʼlum qilinadi”, — deyiladi Oliy sud axborot xizmati xabarida.
“Daryo”dagi maqolada prezident Shavkat Mirziyoyevning 2018-yil Buxoro viloyatiga tashrifi chog‘ida viloyatda tut bargidan choy ishlab chiqarish va uni eksport qilishga doir masala ham ko‘rib chiqilgani, shaxsan davlat rahbari tomonidan bu ishni amalga oshirish bo‘yicha masʼullarga topshiriq berilgani, shuningdek prezident topshirig‘ini bajarishga harakat qilayotgan tadbirkor ayni paytda muammolarga duch kelayotgani bildirilgandi.
“Biz eski binoni olib, uni buzib tashlab, qayta qurdik. Shunga qaramasdan investitsiya kiritmagansizlar degan bahona bilan bino-inshootlarni tortib olishdi. Natijada 360 nafardan ortiq ishchi ishsiz qoldi. Xitoylik hamkorimiz tomonidan kiritilgan 1 million dollarlik, o‘zimiz kiritgan 18 milliard so‘m investitsiya mablag‘larimiz kuyib ketmoqda. Biz tayyor qilgan imkoniyatni tortib olishdi”, — degandi tadbirkor vakili Oliy sud raisidan najot so‘rar ekan.
“Daryo” voqealar rivojini kuzatishda davom etadi.
Izoh (0)