Toshkentning elektrdan uzilgan hududlarida ta’minot qachon tiklanishi ma’lum qilindi

Toshkentning ayrim hududlari elektr taʼminotidan uzilgani xabar qilingan edi. “Hududiy elektr tarmoqlari” ushbu hududlarda tez fursatlarda elektr energiyasi tiklanishini e’lon qildi.

Avval xabar qilinganidek, Toshkent shahridagi “Qo‘qon” podstansiyasida 35 kilovatli kabel tarmog‘ining shikastlanishi natijasida yong‘in sodir bo‘lgan edi. Buning oqibatida Mirobod va Yakkasaroy tumanlari iste’molchilarining bir qismida elektr ta’minotidan uzilgan.

Bundan tashqari, yuqori kuchlanishli elektr tarmog‘idagi nosozlik sabab bir necha nasos stansiyalari elektr ta’minotidan uzildi. Buning natijasida Yashnobod, Yakkasaroy, Mirobod tumanlaridagi bir qator aholi massivlari suvsiz qoldi.

“Hududiy elektr tarmoqlari”ning bildirishicha, hozirda podstansiyadagi nosozlikni bartaraf etish choralari ko‘rilmoqda. Olib borilgan tiklash ishlari natijasida Yakkasaroy tumanining ba’zi hududlarida elektr energiyasi qayta tiklangan. Tez fursatlarda qolgan hududlar ham elektr energiyasiga qayta ulanadi.

Avariyaviy holatni bartaraf etish ishlari tezkor brigada xodimlari hamda maxsus texnika yordamida uzluksiz olib borilmoqda.