Samarqand viloyatining Kattaqo‘rg‘on shahrida begona ayol xonadoniga bostirib kirgan uch yigitga sud hukmi o‘qildi. Yigitlarning ikki nafariga 5 sutkadan qamoq jazosi tayinlangan bo‘lsa, bir nafari jarima to‘laydigan bo‘ldi. Bu haqda “Daryo”ga viloyat IIB axborot xizmati rahbari Jahongir Sagdullayev xabar berdi.
Qayd etilishicha, ijtimoiy tarmoqlarda ichki ishlar xodimlari hamda ikki nafar fuqaro o‘rtasida janjalli holat aks etgan video tarqalgan.
“Ayrimlar buni xodimlar aybsiz fuqarolarni kuch ishlatib, mashinaga bosib ketyapti, deya talqin qildi. Aslida 7-iyun kuni soat tungi 24:00 da uch yigit Kattaqo‘rg‘on shahrining Alisher Navoiy ko‘chasida joylashgan tungi klubga borishadi. Shu payti hududda tungi xizmatni o‘tab yurgan profilaktika inspektorlarini ko‘rib, sababsiz ulardan yashirinish uchun mahalladagi xonadonlardan biriga kirib ketadi.
Yarim tunda taqillagan ovozni eshitgan uy egalari kutilmagan bu holatdan tahlikaga tushib qolishadi. Uy bekasi qo‘rqib, yugurib chiqadi. Buni ko‘rgan yigitlardan biri devordan sakrab, ikkisi esa darvozadan qochib chiqadi. Ayolning turmush o‘rtog‘i va ikki nafar farzandi kasal bo‘lgani sababli notanish kimsalarning bostirib kirishi uni qo‘rquvga soladi”, — deydi viloyat IIB axborot xizmati rahbari.
Begona erkaklarning xonadoniga bostirib kirganidan qo‘rqqan ayol bu haqda ichki ishlar xodimlariga xabar beradi.
“Profilaktika inspektorlari ikki nafar yigitni ushlab, IIB binosiga taklif qilganda qattiq qarshilikka uchrashdi. Yigitlar mahalla osudaligini buzib, baqir-chaqir qilib, xodimlar bilan janjal qilishga o‘tishgan. Ulardan biri hattoki profilaktika inspektorini uch joyidan tishlab, jarohat yetkazgan”, — deydi masʼul.
Qo‘shimcha qilinishicha, holat rasmiylashtirilib, to‘plangan hujjatlar Jinoyat ishlari bo‘yicha Kattaqo‘rg‘on shahar sudiga yuborilgan. Sud 8-iyun kuni hodisa yuzasidan yigitlarga nisbatan qaror chiqardi.
“Ularning yoshligini, oilaviy sharoitlari inobatga olinib biriga jarima, ikkisiga 5 sutkadan maʼmuriy qamoq jazosi tayinlandi”, — deydi Jahongir Sagdullayev.