Rossiya Qozog‘istonga hujum qilishini yoqlagan qozog‘istonlik yigit va qiz 5 yilga qamaldi

Qozog‘istonda “rus dunyosi”ning ikki tarafdori sudlandi. Ular Qozog‘iston hududida “maxsus harbiy operatsiya” bo‘lgan taqdirda Rossiyani qo‘llab-quvvatlashini bildirgan. Bu haqda “Orda.kz” xabar berdi.

Gap Denis Rudniy va Kristina Kolchenko haqida ketmoqda. Ular Uralsk aholisi hisoblanadi. Qozog‘istonliklarga nisbatan separatizm moddasi bo‘yicha 5 yilga ozodlikdan mahrum etish jazosi belgilangan.

Denis Rudniy bloger bilan suhbat chog‘ida Qozog‘istonning Uralsk shahri “aslida rus shahri” ekanini aytgan. Bundan tashqari, u qozoqlarni “mambet” deb atagan va Rossiya Qozog‘istonga hujum qilsa, bosqinchilarni qo‘llab-quvvatlashini bildirgan. Kristina Kolchenko esa Rudniyning fikrini qo‘llab-quvvatlagan.

“Maxsus harbiy opertasiya masalasida siz biz tomon bo‘lasizmi yoki qozoqlar tomon? Agar Rossiya bu yerga kelsa, qaysi tarafda bo‘lasiz?” degan savolga Kolchenko “ruslar uchun” deb javob bergan.

Natijada ularga nisbatan “Nizo qo‘zg‘atish” moddasi bo‘yicha jinoiy ish qo‘zg‘atilib, so‘ngra separatistik bayonotlari uchun jinoiy ish ochilgan. Keyinchalik “rus dunyosi” tarafdorlari uzr so‘ragan, ammo bu ularga yordam bermagan. Shunday qilib, Rudniy 5 yil 2 oyga, Kolchenko esa 5 yilga ozodlikdan mahrum etildi.