Sog‘liqni saqlash vazirining buyrug‘i bilan Farmakologik vositalarning yoki dori vositalarining klinik tadqiqotlarini o‘tkazish tartibi to‘g‘risida nizom tasdiqlandi.
Barcha yangi dori vositalari klinik tadqiqotlarning ijobiy natijasi asosida davlat ro‘yxatidan o‘tkaziladi, bundan ro‘yxatda belgilangan dori vositalari mustasno.
Tasdiqlangan Farmakologik vositalarning yoki dori vositalarining klinik tadqiqotlarini o‘tkazish tartibi to‘g‘risida nizom quyidagilarni belgilaydi:
- klinik tadqiqotlarni o‘tkazishga ruxsatnoma olish tartib-taomili;
- klinik bazada dori vositalarini sinovdan o‘tkazish normalari;
- klinik tadqiqotlarni o‘tkazish jarayonida tomonlarning huquqlari va majburiyatlari;
- klinik tadqiqotlar jarayonida mansabdor shaxslarning harakatlari (harakatsizligi) ustidan shikoyat qilish va uni ko‘rib chiqish.
Sog‘liqni saqlash vazirligining 2023-yil 5-iyundagi 3440-son buyrug‘i bilan 2025-yil 1-yanvargacha bo‘lgan muddatda davlat ro‘yxatidan o‘tkazmasdan, majburiy sertifikatlash sharti bilan tibbiyot amaliyotida qo‘llash va olib kirishga ruxsat beriladigan, O‘zbekistonda davlat ro‘yxatidan o‘tkazilgan analoglari mavjud bo‘lmagan dori vositalari va tibbiy buyumlar ro‘yxati tasdiqlangan. Ro‘yxat 29 ta dori vositalari nomi va 90 ta tibbiy buyumlardan iborat.
Hujjatlar Qonun hujjatlari maʼlumotlari milliy bazasida eʼlon qilingan va 5-iyundan kuchga kirgan.
2023-yil 1-maydan dorixonalarda sotilgan dori vositalari va tibbiy buyumlar uchun belgilangan ustamalardan yuqori mablag‘ olingani aniqlansa, ortiqcha pulni isteʼmolchiga qaytarish tizimi ishga tushirilishi to‘g‘risida xabar berilgandi. Bundan ko‘zlangan maqsad isteʼmolchilar huquqlarini himoya qilish tizimini yanada takomillashtirish va farmatsevtika sohasida qonunchilik meʼyorlarining isteʼmolchi foydasiga ishlashini interaktiv usullarda nazorat qilishdan iborat.
Izoh (0)