Kanadada davom etayotgan keng ko‘lamli o‘rmon yong‘inlari tufayli AQSHning bir qancha shaharlari, jumladan, Nyu-York quyuq tutun bilan qoplandi. Shahar aholisiga niqob taqish tavsiya etilmoqda, deb xabar berdi The Wall Street Journal.
Ijtimoiy tarmoqlarda tutun tufayli hatto osmono‘par binolar ko‘rinmay qolgani aks etgan videolar tarqalmoqda.
Nyu-York dunyodagi havo sifati eng yomon shaharlar reytingida ikkinchi o‘ringa chiqdi. Shahar meri Erik Adams aholini imkon qadar tashqariga chiqmaslikka chaqirdi. Maktablarning ochiq havoda o‘tiladigan darslari bekor qilindi. Odamlarga niqob taqish tavsiya etiladi. Shuningdek, OAV maʼlumotlariga ko‘ra, Nyu-Yorkning La-Guardia aeroportiga yo‘nalgan baʼzi reyslar va aeroportning Nyu-Jersiga uchadigan reyslari to‘xtatilgan.
Meteorologlarning bahosiga ko‘ra, AQSH shaharlardagi havo sifati hafta oxirigacha yaxshilanishi kerak.
2023-yil boshidan beri Kanadaning Kvebek provinsiyasida 400 dan ortiq o‘rmon yong‘inlari aniqlangan, bu odatdagidan ikki barobar ko‘p. Yil boshidan beri Kanada bo‘ylab 3,6 million gektar o‘rmonlar vayron bo‘lgan, shundan 200 ming gektardan ortig‘i Kvebekda. Ayni paytda provinsiyada 160 dan ortiq o‘rmon yong‘inlari faol bo‘lib, ulardan 100 dan ortig‘i hali ham bartaraf etilmagan.
Yong‘in tutuni Kanada va AQSHning sharqiy qirg‘oqlari bo‘ylab tarqalmoqda. Havoning ifloslanishi haqida ogohlantirishlar Nyu-York va Konnektikutda e’lon qilingan, Pensilvaniya, Vermont va Nyu-Jersi shtatlarida ifloslanish darajasi “zaif aholi uchun xavfli”. Kanadadagi o‘rmon yong‘inlari tutuni Minnesota, Viskonsin, Illinoys, Ohayo, Indiana va Kentukki va Virjiniya shtatlarining bir qismida ham havo sifatini pasaytirgan.
Izoh (0)