Qozog‘istonning Ostona va Qirg‘izistonning Bishkek shaharlarida suv yo‘qligidan norozi bo‘lgan aholi ko‘chaga chiqib, yo‘lni to‘smoqda. Bu haqda “Daryo” muxbiri xabar berdi.
Qozog‘istonda g‘azablangan fuqarolar “Millenium Park” turar joy majmuasi yonidagi yo‘lni to‘sib qo‘ydi. Ular 8 kundirki suvsiz yashayotganliklarini ta’kidlab, “suv beringlar” deb murojaat qilmoqda.
Shuningdek, suv yo‘qligi sababli BI Group kompaniyasiga qarashli uyda istiqomat qiluvchi aholi ham yo‘llarni to‘sib qo‘ygan. Qozog‘iston poytaxti aholisining uyida bir necha haftadan beri suv yo‘q.
“Ostonada suv ta’minoti bilan bog‘liq muammolar mavjud va bunga issiq havo, bog‘dorchilik mavsumi va rivojlanayotgan shahar sabab bo‘lmoqda”, — deydi Ostona hokimi Jenis Qosimbek.
Bishkekda ham ichimlik suvi tanqisligi kuzatilmoqda. Jumladan, poytaxtning janubiy mikrorayonlarini tungi vaqtda soat 23:00 dan ertalab 06:00 ga qadar suvni o‘chirishga qaror qilingan. Xususiy “moyka”, hammom va saunalarni ishlatish, kechasi sug‘orish ham taqiqlangan.
Qirg‘iziston parlamenti spikeri Nurlanbek Shakiyev bu borada hech narsa qila olmasliklarini bildirib, bu iqlimga bog‘liqligini aytdi.
“Muhokama qilsak, suv ko‘paymaydi, muzliklar erimay qolmaydi”, — dedi u.
Yana bir deputat Dastan Bekeshev avvalroq bu odamlarni ko‘chaga chiqishga majbur qilishini aytgan edi va haqiqatan ham shunday bo‘ldi. 7-iyun kuni tunda Bishkek janubi-g‘arbidagi Archa-Beshik turar joy massivi aholisi yo‘lni (Janubiy magistral) to‘sib qo‘ydi.
Aholi ichimlik suvi yetishmasligidan norozi. Ular hozirgidek suv bilan bog‘liq bunday muammolar uzoq vaqtdan beri bo‘lmagani, ikki kundan beri suv yo‘qligini aytmoqda.
Ayni paytda Qirg‘iziston poytaxtida anomal issiqlik kuzatilib, havo harorati 40 darajaga yetgan.
“Kun davomida 80 foiz odamlar ishda bo‘lsa, suv kimga kerak? Kechqurun suvni o‘chirasiz, hatto hojatxonaga ham borolmaysiz, yuvinish haqida gapirmasa ham bo‘ladi. Lekin suv uchun tariflarni oshirdingiz! Odamlarning g‘azabini sinayapsizmi?”, — deb yozadi bishkekliklar ijtimoiy tarmoqlarda.
Yevgeniy Korotovskix, Bishkek
Izoh (0)