“Yuventus” Yevropa Superligasi loyihasidan chiqadi. Bu haqda klub rasmiya saytida e’lon qilingan bayonotda ma’lum qilindi.
Turin klubi “Real” va “Barselona” bilan birga ushbu loyihadan voz kechmayotgan jamoalar qatorida edi.
Ispaniyaning AS nashri xabar qilishicha, “Yuventus” UEFAning bosimi ostida ushbu qarorga kelishga majbur bo‘lgan. “Keksa sinyora” bosh direktori Marisio Skanavino “Real” va “Barselona”ga yo‘llagan xatida Yevropa futbol assotsiatsiyasi moliyaviy firibgarlik bilan bog‘liq ishlab sabab “Yuventus”ni Yevrokuboklardan uch yilga chetlatish bilan tahdid qilayotgani haqida yozgan.
Qayd etilishicha, Superliga ta’sischilari UEFAning bu yurishidan g‘azabga to‘lgan va o‘z tarafdorini yuridik tomondan himoya qilishga tayyor.
Biroq “Yuventus” o‘zining rasmiy bayonotida bosim haqidagi xabarlarni inkor etgan.
2021-yilning 18-aprel kuni 12 klub (“Manchester Yunayted”, “Manchester Siti”, “Liverpul”, “Chelsi”, “Arsenal”, “Tottenhem”, “Barselona”, “Real”, “Yuventus”, “Atletiko”, “Inter” va “Milan”) boshchiligida Yevropa Superligasiga asos solingandi. Oradan ikki kun o‘tib qator klublar birin-ketin loyihani tark eta boshladi va Superliga loyihasi vaqtincha to‘xtatildi. Faqat “Real”, “Barselona” va “Yuventus” loyihani tark etmagandi. 2023-yil boshida Superliga qayta tiklanishi borasida xabarlar tarqaldi.
Eslatib o‘tamiz, 2022-yilning noyabrida moliyaviy ayblovlar ortidan “Yuventus” rahbariyati iste’fo bergandi. Yanvar oyida esa klubning sobiq prezidenti Andrea Anyelli va bosh direktor Maurisio Arrivabene 2 yilga, sobiq vitse-prezident Pavel Nedved 8 oyga, Fabio Paratichi esa 2,5 yilga futboldan chetlatilgan.
2023-yilning yanvar oyida A Seriyada klubdan 15 ochko olib qo‘yilgan, aprel oyida qaror bekor qilingandi. May oyida esa 10 ochko olib tashlash borasida yakuniy qaror qabul qilingandi.
Izoh (0)