Xitoy mudofaa vaziri Li Shanfu Singapurda har yili o‘tkaziladigan “Shangri-La dialog” konferensiyasidagi nutqi chog‘ida AQSH mudofaa kuchlari va ularning ittifoqchilari Janubiy Xitoy dengizi va unga tutash hududlarni tark etishi kerakligini aytdi hamda XXRga nisbatan provokatsiya qilmaslikni tavsiya qildi. Bu haqda The Guardian yozmoqda.
Uning so‘zlariga ko‘ra, AQSH va ittifoqchi harbiy-dengiz kuchlari Xitoyga yaqin suv hududlarda “ham dengizdan, ham havodan xavfli va noprofessional xatti-harakatlarni namoyon qilmoqda va o‘z vazifasi bilan shug‘ullanmayapti”.
U Xitoy harbiy-dengiz kuchlari bilan xorijiy kemalar o‘rtasida tez-tez uchrayotgan tushunmovchiliklarni tasdiqladi va bular Xitoyga yaqin suvlarda sodir bo‘lganini ta’kidladi.
Li Shanfu, shuningdek, agar xorijiy harbiy kemalar Janubiy Xitoy dengizi va unga tutash hududlarda joylashtirilsa, Xitoy keskin munosabat bildirishda davom etishini aytib o‘tdi.
“Do‘stlar kelsa, biz ularni ajoyib vino bilan kutib olamiz. Shoqol yoki bo‘rilar kelsa, miltiq bilan”, — dedi Xitoy mudofaa vaziri.
Uning qo‘shimcha qilishicha, Xitoy tinch taraqqiyot yo‘liga sodiq qoladi, biroq o‘zining “qonuniy huquq va manfaatlarini himoya qilishdan tortinmaydi”.
Avvalroq Xitoy AQSHning Singapurda bo‘lib o‘tadigan yillik xavfsizlik forumida ikki davlat mudofaa vazirliklari rahbarlari Lloyd Ostin va Li Shanfu o‘rtasida uchrashuv o‘tkazish haqidagi so‘rovini rad etgandi.
Izoh (0)