Karim Benzema “Real”ni tark etgach, Madrid klubining markaziy hujum chizig‘ida yangi futbolchi paydo bo‘lishi deyarli aniq bo‘ldi.
Ko‘plab OAV “Tottenhem” forvardi Harri Keynning sotib olinishi haqida xabar tarqatmoqda. Shuningdek, Madrid jamoasi “Espanyol” vakili Xoseluga rotatsiyabob hujumchi sifatida qaramoqda.
Shu tariqa “Real” bitta transfer oynasida bir yo‘la ikki nafar 30 va undan katta yoshli futbolchi bilan shartnoma imzolashi mumkin. Bu Madrid jamoasi uchun noodatiy holat hisoblanadi.
2000-yildan shu vaqtga qadar “Qirollik klubi” faqat uch marta 30 yoshdan katta futbolchini jamoaga jalb qilgan va ularning barchasi turli transfer oynasida kelgan.
2007-yilda “Real” darvozabon Yeji Dudek bilan shartnoma imzolaydi. 34 yoshli futbolchi o‘sha vaqtda erkin agent maqomida edi.
2010-yilda ispan klubi 32 yoshli Rikardu Karvalyuni sotib oladi. Transfer uchun “Chelsi”ga 8 million yevro to‘lab beriladi.
2012-yilda esa “Madrid” Diyego Lopesni o‘z safiga qo‘shib oladi. 31 yoshli darvozabon erkin agent sifatida kelgan va keyinroq Iker Kasilyasdan asosiy posbon maqomini olib qo‘ygandi.
“Real” prezidenti Florentino Peres kamdan kam hollarda 30 yoshdan katta bo‘lgan futbolchilarga ishonch bildiradi. “Real”da tarkibdagi 30+ yosh futbolchilar bilan hatto u yulduz bo‘lsa ham 1 mavsumdan ortiq muddatga shartnoma tuzilmasligi borasida yozilmagan qoida borligi ham buning isboti.
To‘g‘ri, Keyn ayni vaqtda 29 yoshda, biroq iyul oyida tug‘ilgan futbolchi “Real” kelgunga qadar 30 lik dovonni zabt etishi deyarli aniq. 2009-yilda “Real”da omadi chopmagan va mavsum davomida bor-yo‘g‘i ikkita o‘yinda maydon tushgan Xoselu esa ayni vaqtda 33 yoshda.
Izoh (0)