Rossiya Mudofaa vazirligi Ukrainaga G‘arb davlatlari bergan Leopard tanklarining sakkiztasini yo‘q qilganini da’vo qilmoqda. Bu haqda vazirlikning 5-iyun yakunida Janubiy-Donetsk yo‘nalishidagi vaziyat bo‘yicha bergan bayonotida aytiladi.
Bayonotga ko‘ra, Ukraina Qurolli kuchlari Janubiy Donetsk yo‘nalishida, ya’ni Ukrainaning Donetsk va Zaporojye viloyatlari ma’muriy chegarasida hujumni davom ettirgan. “Ukraina Qurolli kuchlarining hujumchi bo‘linmalari va harbiy qismlari katta zarar ko‘rdi”, — dedi Mudofaa vazirligi matbuot kotibi Igor Konashenkov.
Uning so‘zlariga ko‘ra, Ukraina tomonining bu yo‘nalishdagi umumiy yo‘qotishlari bir yarim mingdan ortiq odamni, 28 ta tankni, jumladan, sakkizta nemis Leopard va uchta fransuz AMX-10 tanklari, shuningdek, 109 ta zirhli jangovar texnikani tashkil qiladi. Ushbu bayonotning haqiqiyligini tekshirish imkonsiz.
Rossiya Mudofaa vazirligi 4-iyun kuni Ukraina armiyasi Janubiy-Donetsk yo‘nalishida keng ko‘lamli hujumni boshlaganini, biroq Rossiya Qurolli kuchlari hujumlarni qaytarganini da’vo qilmoqda.
5-iyun kuni Rossiya Mudofaa vazirligi maʼlumotlariga ko‘ra, Ukraina armiyasi asosiy kuchlarini Janubiy-Donetsk yo‘nalishidagi Vremevskiy to‘sig‘iga jamlagan holda hujumni davom ettirdi. Vazirlikda aytilishicha, Ukraina Qurolli kuchlari “Oktabr” sovxozi va Novodonetsk yaqinida oldinga siljigan.
Ukraina prezidenti ofisi Rossiya “hali boshlanmagan” global hujumni tasvirlayotganini ta’kidladi.
Rossiya Mudofaa vazirligining 5-iyundagi bayonoti Ukrainada Leopard tanklari yo‘q qilingani haqida birinchi xabar bo‘ldi.
Rossiya Mudofaa vazirligi bir necha bor Rossiya kuchlari Ukrainada HIMARS raketa tizimlarini ishdan chiqarganini ta’kidlagan. Ammo AQSH ham, Ukraina ham Rossiya tomonining da’volarini tasdiqlamagan. The Washington Post gazetasining yozishicha, Ukraina Qurolli kuchlari Rossiyani chuv tushirish uchun HIMARS’ning yog‘och modellaridan foydalanmoqda.
Avvalroq Bloomberg nashri Germaniya va Ukrainaning ittifoqchilari jami hisobda Ukraina Qurolli kuchlariga 112 ta Leopard 2 tankini berishga kelishgani haqida xabar bergandi.