Yaponiyada kuchli yomg‘irlar oqibatida 40 dan ortiq kishi jabrlandi, uch kishi bedarak yo‘qoldi

Yaponiyada “Mavar” to‘foni fonida kuchli yog‘ingarchilik natijasida uch kishi bedarak yo‘qoldi, yana uch kishining ahvoli og‘ir, 40 dan ortiq kishi jarohatlandi, dedi mamlakat hukumati bosh kotibi Xirokazu Matsuno.

Avvalroq bir kishi halok bo‘lgani haqida xabar berilgandi.

“Bu soatga kelib bir kishining o‘limi aniqlandi, uch kishining ahvoli og‘ir, yana uch kishining xavfsizligini tasdiqlashning iloji yo‘q. Jarohat olgan 5 kishining hayoti uchun shifokorlar kurashmoqda, yana 36 kishi yengil tan jarohati oldi”, — dedi Matsuno Tokiodagi matbuot anjumanida.

Yaponiya hukumati 2-iyun kuni “Mavar” tropik bo‘roni sababli Yaponiya bo‘ylab qariyb 1,3 million kishini evakuatsiya qilishni tavsiya qilgandi.

Tabiiy ofat natijasida mamlakat bo‘ylab 300 dan ortiq reys va 52 ta parom bekor qilingan, shuningdek, bir qancha temiryo‘l liniyalari vaqtincha yopilgandi.