O‘zbekistonda 2023/2024-o‘quv yili uchun test sinovlari o‘tkaziladigan 92 ta yopiq inshoot tanlab olingani to‘g‘risida xabar berilgandi. O‘zAning ma’lum qilishicha, test sinovlari yopiq binolarda o‘tkazilishi munosabati bilan test vaqti ham o‘zgaradi.

Avvalgi yillarda imtihonlar stadion va xiyobonlarda o‘tkazilgani sababli 1-smena soat 07:00 dan 10:00 gacha, 2-smena esa 19:00 dan 22:00 gacha o‘tkazilgan edi. Chunki boshqa paytda kun juda issiq bo‘lardi.

Uch yillik tanaffusdan keyin test sinovlarini yana yopiq binolarda o‘tkazilayotgani sababli, endi bunaqa vaqtli va kech imtihon o‘tkazishga ehtiyoj yo‘q. Shu sababli, xuddi 2018—2019-yillarda bo‘lgani kabi test sinovlarida 1-smena soat 08:00 dan, 2-smena esa 15:00 dan boshlanishi rejalashtirilgan.

Stadionlarda o‘tkazilgan test sinovlari

2020/2021-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari ochiq maydonlarda tashkil etilgandi. Shu sababli o‘shanda abituriyentlar xohishiga ko‘ra test sinovlariga bosh kiyim (kepka) bilan kelishlari mumkinligini bildirilgan. 2-sentabrda Farg‘onada imtihonga kelgan abituriyentlarga do‘ppi tarqatilgandi.

2021-yilning avgust oyi boshida O‘zbekiston Davlat test markazining rasmiy veb-saytiga 2021/2022-o‘quv yili uchun oliy ta’lim muassasalarining bakalavriat ta’lim yo‘nalishlariga kirish test sinovlari o‘tkaziladigan stadion va xiyobonlar bo‘yicha ma’lumotlar e’lon qilingandi. Xususan, Toshkent shahrida OTMlarga kirish imtihonlari “Paxtakor” va “Bunyodkor” stadionlari, shuningdek, “G‘alaba” va “Botanika” bog‘larida bo‘lib o‘tgandi. 2022-yilda ham OTMlarga kirish imtihonlari ochiq havoda o‘tkazildi.