O‘zbekistonda hafta davomida havo harorati ko‘tarilishi davom etadi

Hafta davomida O‘zbekiston hududi bo‘yicha quruq va issiq ob-havo bo‘lishi kutilmoqda, deb xabar berdi “O‘zgidromet”.

5–9-iyun kunlari respublikaning barcha hududlarida havo biroz bulutli bo‘ladi, ba’zi joylarda o‘zgarib turadi, yog‘ingarchilik kutilmaydi. Haroratning asta-sekin ko‘tarilishi davom etadi. Ish haftasining oxiriga kelib, kunduzi havo 37-40 darajagacha, 5–6-iyunda respublikaning shimolida, 6–8-iyunda janubda va cho‘l hududlarda 41-42 darajagacha isiydi.

Qayd etilishicha, bunday harorat iyun oyining birinchi o‘n kunligi uchun me’yoriy qiymatlardan 4-6 darajaga yuqoridir. Ammo ushbu davrda bundan ham yuqori harorat qiymatlari kuzatilgan.

Tog‘li hududlarda ushbu haftada asosan yog‘ingarchiliksiz ob-havo bo‘ladi, faqat Farg‘ona vodiysi bilan chegaradosh ayrim tog‘li hududlarda bugun kunning ikkinchi yarmida qisqa muddatli yomg‘ir yog‘ishi, momaqaldiroq bo‘lishi mumkin.

Respublikaning shimolida, janubida va cho‘l hududlarida 7–8-iyunda ba’zi joylarda shamol 15-20 metr/sekundgacha kuchayishi, ayrim joylarda chang-to‘zonlar bilan kuzatilishi mumkin.

Toshkentda 5–9-iyun kunlari havo kam bulutli bo‘ladi. Harorat hafta boshida 35-37 daraja bo‘ladi, hafta oxiriga kelib, 38-40 darajagacha  ko‘tariladi.

“O‘zgidromet” 5–8-iyun kunlari Eron hududlaridan issiq havo kirib kelishidan avvalroq ogohlantirgandi.