Toshkentda pul evaziga haj vizasi va kvota olib bermoqchi bo‘lganlar ushlandi

Toshkentda pul evaziga haj vizasi va ziyorat uchun kvota olib bermoqchi bo‘lgan shaxslar qo‘lga tushdi. Bu haqda O‘zA xabar berdi. 

Bosh prokuratura huzuridagi iqtisodiy jinoyatlarga qarshi kurashish departamentining Yashnobod tumani bo‘limi xodimlari tomonidan va boshqa huquqni muhofaza qiluvchi idoralar xodimlari bilan hamkorlikda 31-may kuni fuqaro I.B. arizasida keltirilgan vajlarni tekshirib ko‘rish maqsadida Yunusobod tumanidagi “Z.T.” MCHJ ofisida tezkor tadbir o‘tkazilgan.

Tadbirda, “Z.T.” MCHJ rahbari “I.D.” fuqaro “I.B.”ning ishonchiga kirib, uni aldab, o‘zining Din ishlari qo‘mitasida ishlovchi tanishlari orqali 12 500 dollar evaziga haj ziyoratini amalga oshirish uchun kvota olib berishni vaʼda qilib, shundan ming dollarni olgan vaqtda xolislar ishtirokida ashyoviy dalillar bilan ushlangan.

Bundan tashqari, departamentning Toshkent shahar Yashnobod tumani bo‘limi xodimlari tomonidan va boshqa huquqni muhofaza qiluvchi idoralar xodimlari bilan hamkorlikda 2-iyun kuni fuqaro T.I. arizasida keltirilgan vajlarni tekshirib ko‘rish maqsadida Uchtepa tumanidagi “A.K.” MCHJ ofisida tezkor tadbir o‘tkazilgan.

Tadbirda, MCHJ rahbari A.M. va jamiyat xodimlari I.I., M.X. bir guruhga birlashib, oldindan jinoiy til biriktirib, fuqaro T.I.ning ishonchiga kirib, uni aldab, unga yuqori lavozimda ishlovchi mansabdor tanishlari orqali 10 ming dollar evaziga haj ziyoratini amalga oshirish uchun haj vizasi qilib berishni vaʼda qilib, shundan 3 ming dollarni olgan vaqtda xolislar ishtirokida ashyoviy dalillar bilan ushlangan.

Mazkur holat yuzasidan A.M., M.I., A.M. va boshqalarga nisbatan Jinoyat kodeksning 168-moddasi 2-qismi “b” bandi va 28,211-moddasi 1-qismi bilan jinoyat ishi qo‘zg‘atilib, dastlabki tergov harakatlarini olib borilmoqda.

Din ishlari bo‘yicha qo‘mita haj safariga yuborayotgan firmalardan ehtiyot bo‘lishga chaqirgandi.  “O‘zbekiston uchun ajratilgan haj kvotasi faqatgina Din ishlari bo‘yicha qo‘mita va O‘zbekiston musulmonlari idorasi tomonidan tashkil etiladigan haj safariga otlangan ziyoratchilarga ajratilgan, shunday ekan, ayrimlarning O‘zbekiston orqali haj safariga jo‘natamiz, degan aldovlariga uchmang”, — deya ogohlantirgandi qo‘mita.