Madridning “Real” klubi Mariano Dias, Eden Azar va Marko Asensioning jamoadan ketishini e’lon qildi.
Belgiyalik futbolchi va “qaymoqranglilar” 2024-yilgacha amal qiladigan shartnomani 2023-yilning 30-iyun sanasida bekor qilishga kelishib oldi. Eden Azar “Real Madrid” safida jami 76 ta o‘yin o‘tkazib, 7 ta gol urdi va 12 ta golli uzatmani amalga oshirdi.
Azar 2019-yilning yozida 115 million yevro evaziga “Chelsi”dan “Real”ga o‘tgandi. U “Qirollik klubi” bilan 8 ta sovrinni qo‘lga kiritdi. Futbolchi bir martadan Chempionlar Ligasi, Klublar o‘rtasidagi Jahon chempionati, Yevropa Superkubogida va ikki martadan La Liga, Ispaniya Kubogi va mamlakat Superkubogida g‘olib chiqdi.
Hujumkor yarim himoyachi Marko Asensio ham 2022/23-yilgi mavsum yakunlanganidan keyin “Real Madrid”ni tark etadi. Ispaniyalik futbolchining amaldagi shartnomasi iyul oyida yakuniga yetadi va u erkin agentga aylanadi.
Xabarlarga ko‘ra, Asensio faoliyatini “PSJ”da davom ettiradi.
Asensio “Real Madrid” tarkibiga 2015-yilda kelib qo‘shilgan. Futbolchi “qaymoqranglilar” safida uch marta Chempionlar Ligasida, to‘rt marta Klublar o‘rtasidagi Jahon chempionatida, uch marta Yevropa Superkubogida, uch marta La Ligada, bir marta Ispaniya Kubogida va uch marta Ispaniya Superkubogida g‘alaba qozongan.
“Real Madrid” hujumchisi Mariano Dias jamoani tark etishini e’lon qildi. “Qirollik klubi” akademiyasida shug‘ullangan dominikanlik futbolchi Madrid jamoasi asosiy tarkibida olti mavsumni o‘tkazdi.
Dias ispan klubi safida 13 ta sovrin yutdi. U ikki marta Chempionlar Ligasi, uch marta Klublar o‘rtasidagi Jahon chempionati, ikki marta Yevropa Superkubogi, uch marta La Liga, bir marta Ispaniya Kubogi va ikki marta Ispaniya Superkubogini boshi uzra ko‘targan.
Izoh (0)