Anqarada 3-iyun kuni Turkiya prezidenti inauguratsiyasi marosimi bo‘lib o‘tdi. Unda Shavkat Mirziyoyev ham ishtirok etdi.
Rajab Toyyib Erdo‘g‘on 28-maydagi saylovda Turkiya prezidenti etib qayta saylangandi.
Prezident matbuot xizmatining qayd etishicha, tadbirda dunyoning 80 ga yaqin mamlakatlari vakillari — davlat va hukumat rahbarlari, parlament spikerlari, yuqori darajadagi rasmiy shaxslar hamda Turkiy davlatlar tashkiloti, Shimoliy Atlantika shartnomasi tashkiloti, Islom hamkorlik tashkiloti va boshqa nufuzli xalqaro tuzilmalar rahbarlari qatnashdi.
Marosim chog‘ida Shavkat Mirziyoyev Turkiya yetakchisini saylovdagi g‘alabasi bilan yana bir bor qutlab, lavozimga kirishgani bilan tabrikladi, Turkiya xalqiga katta muvaffaqiyatlar va farovonlik tiladi.
Tadbir doirasida davlat rahbari marosimga taklif etilgan mamlakatlar yetakchilari va xalqaro tashkilotlar rahbarlari bilan fikr almashdi.
Shu bilan Anqaraga tashrif dasturi yakuniga yetib, prezident Toshkentga jo‘nab ketdi.
Izoh (0)