Vengriya hukumati Ukrainada o‘t ochishni to‘xtatishga chaqiruvchi videorolik e’lon qildi, unda Ukraina xaritasi Qrimsiz ko‘rsatilgan. “Strana” ukrain nashri bunga e’tibor qaratdi.
“O‘n minglab bolalar yetim qoldi, yuz minglab uylar vayron bo‘ldi, o‘n milliondan ortiq odam o‘z uyini tashlab ketishga majbur bo‘ldi, ammo urush davom etmoqda va hademay, global tus olishi mumkin. Urushni bas qiling, faqat o‘t ochishni to‘xtatish vayronagarchilikka chek qo‘yishi mumkin, faqat tinch muzokaralar odamlar hayotini saqlab qolishi mumkin. Tinchlik vaqti keldi”, — deyiladi videoda.
Rolikda ushbu so‘zlar fonida bolalar va ayollar, urushdan vayron bo‘lgan shaharlar tasviri ko‘rsatilgan. Urushning global mojaroga aylanishi ehtimoli haqida gap ketganda, ekranda Ukraina xaritasi paydo bo‘ladi, ammo u Rossiya tomonidan anneksiya qilingan Qrim hududini o‘z ichiga olmaydi.
Rasmiy Vengriya Qrimning anneksiya qilinishini qonuniy deb tan olmagan edi.
Iyun oyi boshida Vengriya bosh vaziri Viktor Orban Ukraina Qurolli kuchlarining qarshi hujumining oldini olishga va “qonli qirg‘in”ga yo‘l qo‘ymaslik uchun Moskva va Kiyev o‘rtasida muzokaralar boshlashga chaqirdi.
Ukraina prezident ofisi rahbarining maslahatchisi Mixail Podolyak Orbanning bayonotiga javob berib, unga Vladimir Putinni butun Ukrainadan rus qo‘shinlarini olib chiqishga ko‘ndirishni taklif qildi.
O‘z navbatida, Rossiya prezidentining matbuot kotibi Dmitriy Peskov Kreml Kiyev bilan tinch muloqot uchun zarur sharoit ko‘rmayotganini aytdi.