Toshkent shahrining Chilonzor tumanida joylashgan maktablarning birida yuz bergan janjal bo‘yicha jinoyat ishi qo‘zg‘atildi. Bu haqda poytaxt IIBB axborot xizmati xabar berdi.
Qayd etilishicha, 23-may kuni taxminan soat 11:00 larda Chilonzor tumanida joylashgan maktablardan birining oldida 10-sinf o‘quvchilari A.X. va D.O‘. shu maktabning 9-sinf o‘quvchilari Sh.E. va I.T. bilan o‘zaro kelib chiqqan kelishmovchilik sababli janjallashgan.
Janjal oqibatida Sh.E. va I.T. tan jarohati olib, shifoxonaga yotqizilgan. O‘tkazilgan sud-tibbiy ekspertizaning xulosasiga ko‘ra, jabrlanuvchilarga sog‘liqni qisqa muddatga buzilishiga olib kelgan yengil tan jarohati yetkazilgani aniqlangan.
Mazkur holat yuzasidan Chilonzor tumani IIO FMB huzuridagi Tergov bo‘limi tomonidan Jinoyat kodeksining 109-moddasi (qasddan badanga yengil shikast yetkazish) 2-qismi bilan jinoyat ishi qo‘zg‘atilgan. Tergov davom etmoqda.
O‘quvchilar o‘rtasida mushtlashuvlar
2022-yilning oktabrida ijtimoiy tarmoqlarda Namanganning Kosonsoy tumanida maktab o‘quvchilari mushtlashuvi aks etgan tasvirlar tarqalgandi. Noyabrda esa Toshkentda o‘quvchilar futboldagi janjal sabab mushtlashib ketgan edi. Keyinroq poytaxt IIBB voqeaga munosabat bildirib, mazkur holat yuzasidan Yangihayot tumani IIO FMB tomonidan tekshiruv o‘tkazilayotganini ma’lum qilgan.
Shuningdek, Toshkentda maktab o‘quvchilari “Amerika kinosiga taqlid qilib” mushtlashuv uyushtirgani, Xorazm viloyati Urganch tumanida joylashgan ikki maktab o‘quvchisi o‘rtasida janjal sodir bo‘lgani to‘g‘risida xabar berilgandi.