Peterburg xalqaro iqtisodiy forumida tarixda birinchi marta yetakchi g‘arb ommaviy axborot vositalari vakillari qatnashmaydi. Bu haqda The Bell internet-nashri xabar berdi.
Tahririyat so‘roviga ko‘ra, Kreml matbuot kotibi Dmitriy Peskov Rossiya rasmiylari “bu yil do‘st bo‘lmagan mamlakatlar jurnalistlarini akkreditatsiyadan o‘tkazmaslik to‘g‘risida” qaror qabul qilganini tasdiqladi. Rossiyada “do‘st bo‘lmagan” davlatlar — bu Moskvaga qarshi sanksiyalar qo‘ygan yoki ularni qo‘llab-quvvatlagan mamlakatlardir. Hozirgi vaqtda ushbu ro‘yxatga Yevropa Ittifoqining barcha mamlakatlari, shuningdek, Avstraliya, Albaniya, Andorra, Buyuk Britaniya (jumladan, Jyersi, Anguilla, Britaniya Virjiniya orollari, Gibraltar), Islandiya, Kanada, Lixtenshteyn, Mikroneziya, Monako, Yangi Zelandiya, Norvegiya, Koreya Respublikasi, San-Marino, Shimoliy Makedoniya, Singapur, AQSH, Tayvan, Ukraina, Chernogoriya, Shveysariya va Yaponiya kiradi.
Peterburg xalqaro iqtisodiy forumi 2023-yil 14-iyundan 17-iyungacha bo‘lib o‘tadi. Uning mavzusi “Suveren taraqqiyot – adolatli dunyo poydevori, kelajak avlodlar uchun kuchlarni birlashtiraylik”. Qayd etilishicha, ma’ruzachilar ro‘yxatida faylasuf Aleksandr Dugin, aktyor Vladimir Moshkov, shuningdek, prankerlar Vovan va Leksus bor.